Awe e avion “Hurricane Hunter Hercules” tabata di bishita na Aruba en conexion cu e tour di conscientisacion riba horcan, den cual varios cientifico di National Hurricane Center di Merca ta biahando rond di Caribe cu e tripulacion di e avion Hurricane Hunter WC-130J di USAF.
A conta cu presencia di Minister Zita Jesus-Leito for di Corsou, kende a regresa nos isla ruman den e Hurricane Hunter Hercules. Tambe tabata presente Director di Meteo Corsou, Albert Martis y Dave Barkmeyer, Director Interino di Meteo Aruba. E Ministernan y invitadonan a cera conoci cu Hurricane Hunter Hercules di cerca y a haya un splicacion amplio di operacion di e avion aki ora di un horcan.
Pensando semper riba e desaroyo di nos siguiente generacionnan, Minister Chris Romero a dicidi di invita un grupo di studiante di scolnan MAVO pa conoce e Hurricane Hunter Hercules. Scolnan cu tabata presente tabata Ceque College, La Salle College, Filomena College y Abraham de Veer School. E studiantenan a keda contento di a conoce e Hurricane Hunter WC-130J y haya e splicacion cientifico di e trabounan cu ta realisa y e importancia di e tipo di avionnan aki.
