Diasabra anochi a tuma luga e evento organisa p’e studiantenan di Universidad di Aruba (UA) pa recauda fondo. Tabata trata aki di un show di talento na Cas di Cultura den cua tabatin presentacion di canto y baile. Hannah Buenaventura, studiante di UA, kende tabata encarga cu e sponsornan pa e evento como tambe e participantenan, a bisa cu esaki a bay hopi bon. Nan a logra obtene mas o menos 40 sponsor en total.
Hannah a splica cu prome nan tabata dos grupo separa, uno cu a scoge Aruba Animal Shelter como nan fundacion y e otro cu a scoge Luna Foundation, pero debi cu ambos grupo kier a organisa un show di talento a opta pa combina y realisa un solo evento. Meta pa esaki tabata pa recauda fondo pa e dos fundacionnan menciona.
E show mes tabata consisti di tres categoria, un di musico, un di canto y uno di baile. Hannah a manda palabra di gradicimento pa tur e 40 sponsornan pa nan aporte na e bon causa y tambe tur otro hende cu di un of otro manera a aporta na esaki. A gradici specialmente e dos representantenan di e fundacionnan cu a tuma tempo pa t’ey presente y participa como hurado den e show di talento. Por ultimo a gradici tur persona cu a cumpra un ticket di nan p’asina yuda recauda mas fondo p’e fundacionnan.
Pa un relato mas amplio, lesa edicion di TREMPAN.
