Studiante di Universidad di Aruba a organisa rifa pa yuda Cares for Ethan

Como proyecto final di Events Management e studiantenan di Universidad di Aruba mester a organisa un evento pa por duna bek na un fundacion. Anaïs Maduro, Fernando Dirksen, y Stanley Valois-Smith a organisa un rifa pa por duna bek na Cares for Ethan. E rifa tabata un exito total unda cu a surpasa e suma inicial cu kier a logra di 5mil florin. 

Ariba 15 di mei a anuncia durante e brunch pa Ethan, cu a tuma luga na Riu Antillas, cu e suma cu a logra yega pa Ethan tabata 32,507.40. E studiantenan kier a yega un suma cu por a yuda Ethan y mayor cu e gastonan extra cu tin tur luna y tambe pa yega na un rolstoel pa Ethan. Di e suma aki a wordo paga pa Ethan por bay e convention di Epidermolysis Bullosa (EB) na Merca cual tabata e ticketnan di e convention hunto cu e pasashi. Un compania local tambe ta den e proceso pa sponsor Ethan su rolstoel.

E studiantenan di Universidad di Aruba hunto cu e mama di Ethan kier a duna danki na henter pueblo di Aruba cu a yuda den un of otro manera pa por a yega e bunita suma aki cu sigur lo yuda Ethan masha hopi mes. Tambe kier a duna un danki na tur e persona nan cu a yuda haci e rifa aki un exito total.