Studiante Canades a transporta 35 kilo di Marihuana pa 3 mil dollar

Diabierna ultimo Corte a trata e caso penal contra un mucha homber, Denzel Lynch Blair, di Canada, kende parce tabata un basketbolista masha conoci di su universidad y cu a gana varios premio. Pero awe e ta cera na Aruba pa transporte di 35 kilo di marihuana, a cambio di un suma insignificante.

Dia 3 di februari ultimo el a yega Aruba hunto cu dos amiga pa vakantie. “Un mi a invita pa bini cu mi y mi a amiga a invita e otro,” asina Denzel Lynch Blair a splica Hues diabierna mainta. Despues di a duna diferente declaracion y contradictorio, dado momento el a bisa Hues “awo mi ta bay papia e berdad”.

A descubri’e facilmente na su yegada, pasobra for di prome instante e tabata mustra sospechoso. E no tabata kier a pasa e maleta door di mashin, pasobra no ta di dje. Su maleta a bin pero e no por hay’e. Hasta ora cu a bay na e baggage belt y cu a mira e maleta ta draai rond el a duda pa recoge. Na final el a coy e maleta aki y a resulta cu tanto den e maleta ey como esun cu e tabata prome cun’e den su man y den su handbag, tabatin droga scondi. E dos maletanan tabata na lock y e tabata sa e combinacion pa habri ambos.

Dilanti Hues sinembargo el a bisa “mi a bin cu solamente un maleta preto y un handbag preto. E otronan no ta dimi, Señora Hues,” el a bisa. E Magistrado sinembargo a keda insisti di con si su maleta ta preto, pakico el a bay trata di coy e biña pasobra a mir’e den diferente filmacion na e maleta, den cual tabatin droga (marihuana) tambe. Su simpel contesta tabata cu e tabata busca su maleta y tabata wak e nombernan. Pero asina mes Hues a mustr’e riba e hecho cu si e tabata busca su maleta, anto e mester wak maletanan preto y no e biña. Pero el a keda para’riba cu dos maleta so, un grandi y un di man, el a bin cun’e.

A constata cu aña pasa caba e tabata den Caribe y a bishit’e Turks & Caicos. A mustr’e tambe riba diferente mensahe riba su celular, cu e no ta cordanan y cual parce ta indica cu no solamente el a yega di transporta droga caba pero tambe e ta busca mula pa doño di e droga. El a splica Hues cu el a cay den tentacion ora cu e tabatin mester di placa pa paga huur di su apartamento. E tabatin su amiga na estado y ta studiando na Universidad di Winnipeg, ta hunga basketball pa e Universidad y falta un aña so.

(https://www.facebook.com/search/top/?q=Denzel%20Lynch%20Blair&epa=SEARCH_BOX).

E tabata studiando Kinesiologia o cinesiologia (cu ta e estudio cientifico di movemento humano haciendo uzo di e principionan di ciencia fisico, e musculonan). Fiscal a bisa e acusado cu den tur e maletanan a haya pakinan di marihuana comprimi. Na momento cu a pisa esaki a mustra cu e cargamento tabata un poco mas cu 35 kilo. E representante di Ministerio Publico a tene cuenta cu loke ta wordo pidi den casonan asina door di Hof y na Hulanda y asina a yega na un demanda di 20 luna.

Abogado Mr. Illes, kende a representa e acusado, a splica cu su cliente ta keda para riba cu no ta tur e maletanan ta di dje. Esaki facilmente por a wordo verifica. Ora di check-in e tabatin solamente dos piesa cun’e, esun maleta grandi y e handbag. Riba e otro maleta tin un otro nomber y fam, pues mester a wordo entrega door di otro persona. Pero loke ta remarcabel, segun e abogado, e nomber ta mescos cu di un pareha cu a biaha riba e mesun vuelo cu su cliente y tabata sinta banda di dje den avion tambe. Pues, su cliente no por ta responsabel pa tur otro hende cu kier a drenta Aruba cu droga.

E acusado a haya un decepcion grandi pasobra Hues a inform’e cu ta te aki tres siman lo tin sentencia, mientras cu el a pensa cu e lo ta di biaha. Dia 13 di september proximo lo dicta su sentencia.

Comments

comments