Diabierna mainta tempran, esnan cu ta encarga pa duna tour na turistanan, a bati alarma na autoridadnan concerni cu e edificacion of structura di e Goudsmelterij di Bushiribana, a haya scheur aden y esey sigur ta algo di preocupa.
Autoridad a presenta na e sitio y a nota cu parti di e porta, como tambe e bentana cu bista pa lama, tin scheur cu, a prefera pa hende no drenta e parti paden di e structura. DOW tambe a presenta y a pone baricada, pa asina ningun hende por drenta, mirando e peliger cu e ta presenta.
Pa loke ta e turistanan, nan por subi e parti ariba cu por wak den e edificio, pero den dje mes, nan no por drenta.
Esaki sigur ta un noticia poco alarmante pa nos, mirando cu Bushiribanda ta un patrimonio nacional cu ta refleha e epoca di oro na Aruba.
El a wordo traha pa Aruba Island gold Mining Company na 1825 pa asina extrae oro for di un di e seronan cu a wordo mina cerca di Sero Plat. El a keda habri pa dies aña. Awendia e ta keda un stop obligatorio pa turistanan na caminda pa bay Natural Bridge, cu a cay den otro dia 2 di September, 2005.
Ta di spera cu pronto por haci algo, pa asina mantene e structura, pa e no sigui scheur mas, pasobra e ora e lo bira manera cu a pasa cu Natural Bridge, erosion por caba cun’e.
