Aña pasa dia 31 di December 2017 e acuerdo di “hedging” cu WEB Aruba N.V. tabatin a caduca. E tempo ey e Gobierno  nobo a sinta caba y aunke nan lo a prefera pa NO “hedge”, nan no tabatin mucho recurso y a opta pa sigui toch, pero solamente 3 luna mas. A firma un acuerdo di “Hedging” desde 1 di januari 2018 pa 31 di maart 2018. E tempo ey a acorda cu e compania di seguro cu ta sigura e prijs di Heavy Fuel Oil na 56 dollar Mericano (US$ 56,=) pa bari. Na momento cu e contract a caba dia 31 di maart 2018, e prijs pa bari tabata na mas o menos US$ 60,=.

Riba ordo di Gobierno di Aruba, siendo e doño di Utilities Aruba N.V., a ordena e compania pa stop cu e proceso di sigura e prijs di crudo. E ultimo aki consecuentemente a informa su dos companianan NV Elmar y WEB Aruba NV di e decisión y pa nan implementa e ordo duna dor di nan “aandeelhouder”. Claro cu tanto WEB como Utilities a desconseha Gobierno riba e decisión aki pero ta parce cu e tabata mas bien un punto político. Ni maske cuanto a splica di e consecuencianan cu e decisión aki lo por tin, toch a pusha pa elimina “hedging”.

Desde dia cu a stop cu e seguro internacional aki, prijs di crudo tabata na US$60 pa bari y awor prijsnan a subi te surpasa US$78 pa bari. Expertonan ta pronostica cu e tendencia ey lo continua, specialmente dor di e problemanan entre Merca y Iran. Tur esaki sin conta e retonan cu Venezuela ta pasando dor di dje cu lo por afecta e prijs mas ainda. Pero, tur esaki ta pronostico, pasobra lo por tin otro desaroyonan cu por reduci e tarifanan tambe. Diabierna ultimo mes prijs di petróleo a baha después di tin 6 siman subiendo so. Pues e posibilidad cu e por baha tey ainda, aunke e no ta mucho si.

WEB Aruba NV a menciona cu internamente nan ta haciendo tur posibel pa reduci nan gastonan di operacion, wanta cu proyectonan pa otro aña y revisa nan inversionnan. Tur esey pa por “wanta e sla” di e aumento di crudo mas cu nan por internamente. Pero, ta conoci cu si e prijsnan sigui aumenta, cu ningun compania lo por absorba e perdida y lo pase pa clientenan tardi of trempan.

Den e proceso, WEB Aruba NV tabata cumpra “Heavy Fuel Oil” for di CITGO como parti di e deal cu Gobierno di Aruba. A opta pa sali for di e contract aki y ta cumpra awor di un proveedor nobo. Na fin di april ultimo a cumpra e prome cargacion di e producto y a haya un tarifa di M-2 cu ta nifica e prijs di dos luna prome, pues di februari. Esey a cumbini WEB Aruba NV masha. Pero si nos cumpra na luna di juli proximo, nos lo mester paga M-1 pues e prijs di un luna prome cu lo ta juni. Y mirando e aumento cu tabatin y cu ta pronostica cu lo tin, e ora den juli pa augustus lo mester adapta tarifanan urgente, sino WEB lo cuminsa core den perdida.

Comments

comments