Stichting Parkietenbos ta logra 710 firma Durante e promer mainta di coleccion di firma

Diadomingo ultimo Stichting Parkietenbos a tene su promer actividad di coleccion di firma pa protesta contra contaminacion di nan barionan. For di 9 or di mainta te cu 2 or di atardi por a bishita e Centro Deportivo Simeon Antonio pa firma e lista.

Na final di e dia un total di 710 firma a ser colecciona. Awe e campaña online ta cuminsa via di Facebook. Stichting Parkietenbos ta considera e promer dia un exito pero alabes e directiv ata sinti un urgencia mas grandi ainda pa exigi di Gobierno atencion inmediato pa resolve e contaminacion cu ta bin di Ser’i Teishi y e kimamento na Dump di Parkietenbos. Hopi hende cu ta sufri di diferente malesa a acudi na e accion di firma; esnan cu alergia, wowo malo, garganta malo, nanishi malo y astma.

Tambe hopi hende grandi cu ya ta sufri di un otro malesa nan salud a bay mas atras pa motibo di e gasnan toxico y holor stinki cu ta sali di Ser’i Teishi y e Dump di Parkietenbos. Kimamento di tire ta un di e molesternan cu tambe hopi habitante a keha di dje. Ora di kima tire ta gasnan hopi toxico manera Dioxine ta ser manda den aire cu ta canceroso. Den e siguiente simannan e  accion pa colecciona firma lo sigui online y na diferente establecimento.