E fundacion di Parkietenbos representando e habitantenan di; Mahuma, Parkietenbos, Buena Vista, Simeon Antonio y Bucutiweg a reuni cu Minister Otmar Oduber y su conseheronan y a haci entrega di un manifiesto. Na promer lugar a reuni pa reclama e holor teribel cu ta afectando e barionan y alabes pa haya aclaracion riba diferente punto pa loke ta e situacion di ceramento di e Dump na Parkietenbos y proceso pa yega na un solucion duradero pa e maneho di desperdicio pa Aruba.
Durante varios luna habitantenan di e barionan menciona y awor tambe Dakota y Wayaca ta kehando di gas y holor malo. Tin fuerte indicacion cu fuera di e Dump na Parkietenbos e holor lo ta bini tambe di Ser’i Teishi y Barcadera.
Un delegacion di e fundacion a bishita Serlimar y tambe Ecogas y a pone nan na haltura di e situacion insoportabel cu no por continua. Na Ecogas a topa cu un sero di sushi cu ta e resto di loke ta ser procesa pa e planta. E sero aki tabata poni riba e tereno patras di nan facilidadnan y cual ta hole malo. Na Ser’i Teishi caminda cu e bultonan di desperdicio procesa pa Ecogas ta ser dera tambe a topa cu un situacion cu e holor ta masha stinki y fuerte mes.
Ambos compania esta; Ecogas y Serlimar a ser informa di parti di e fundacion cu e habitantenan ta sofocando di e gas y holor malo cu lo ta saliendo di nan tereno y facilidadnan y cu e habitanan no por sigui soporta e situacion aki mas.
Minister Otmar Oduber y su conseheronan a informa e miembronan di e fundación di den forma hopi cla tocante di e Ley importante cu ta bayendo Parlamento y con leu e proceso di destaho publico ta, pa yega na un solucion duradero pa Aruba. E fundacion gradici pa e enorme trabao cu ya a ser haci y ta apoya cualkier ley cu ta bayendo Parlamento cu ta percura pa soluciona e problema di maneho di desperdicio y será e dump na Parkietenbos, e barionan y pueblo di Aruba ta demanda un solucion. Hopi kisas no ta compronde ainda cu aki ta trata di un situacion di urgencia, ta hopi hende den e barionan concerni nan salud ya a ser afecta. E periodo aki ta birando un di esunnan di mas pio pa loke ta holor y gas cu e barionan a yega di pasa den, den e ultimo añanan. E fundacion ta apoya cualkier iniciativa pa deshaci di e sushedad di Aruba, sinembargo si ta e “Incenerator” ta e solucion mas duradero pa Aruba pa e siguiente 20 pa 30 añanan, anto e decision corecto y mester wordo tuma mas pronto posibel pa salvaguardia e salud di e habitantenan. Asina e fundacion Stichting Parkietenbos ta desea di informa e habitantenan di e barionan y pueblo di Aruba.
