Stichting Musica a organiza un “Thank You Party” pa su Branding Partners cu a patronisa Aruba Caiso & Soca Monarch 2019. Durante e anochi aki Stichting Musica a gradici su partner nan pa nan sosten na nos musico y artistanan local y pa e confianza pa traha hunto cu Stichting Musica, organisador di e festival musical pa 7 aña consecutivo.
Un anochi cu bon musica di DJ Eduardo di Elite Entertainment & Productions na unda e partners a disfruta di un un ambiente unico na Rum Reef Cocktail Bar & Grill na Seroe Colarado cu tabata encarga cu e servicio di F&B. Hopi sabroso tabata e Johnny Cake cu Bacalao cu Shrimps, simplemente Maureen su receta. 
Stichting Musica a keda sumamente contento cu e atendencia di su partners y esaki ta muestra tambe di e reconocimento “Thank You“ cu a keda entrega na cada un di e partner nan, cu a haci e festival posibel e aña aki. MC Maicky Oliva a presenta e Board di Stichting Musica den presencia di Bobby Gibbs, Inky Richardson, Ivor Lee y Edwina Werleman. Durante su discurso, Presidente di Stichting Musica, sra. Edwina Werleman, a subraya cu e aporte di cada un di e partnernan na e festival ta uno di sumo importancia y ta indespensabel. 
Tambe a expresa gratitud pa e aporte na nos musico y artista nan cu ta curazon di, no solamente e festival, pero tambe di Aruba su Carnaval. Nan musica ta carga nos dushi paradanan di Carnaval, cu nan cancion y bon ritmo pe participante nan por baila y gosa hunto cu e publico na banda. Ta e partnernan ta contribui y yuda e fundacion carga gran parti di e gastonan. Cada aña por mira crecimento den e festival. Pa e motibo aki e organisacion ta pone enfasis riba tene un bon relacion cu partners di e festival, no solamente durante e periodo di Carnaval y den transcurso di e preparacionnan pa e festival, pero tambe durante henter aña cual ta haci Stichting Musica y su partners un famia. 
Durante e mesun anochi aki a honra Tsunami tambe su premio di 5.000,00 florin como “Banda di Anja“ pa Carnival 2019. E partnernan presente a expresa nan satisfaccion cu e colaboracion cu Stichting Musica y Aruba Caiso & Soca Monarch, cual sigur ta un motivacion pa sigi traha duro pa mantene e festival musical mas grandi di Aruba riba un nivel halto y sigi surpasa e expectativa di e audiencia y partner nan.
