Stichting Kompas For Students, cu ta establece na Hulanda, ta un fundacion cu ta prepara studiantenan for di Aruba te ora cu nan yega Hulanda pa sigui cu nan estudionan avansa.

Den cuadro di esaki nan ta na Aruba actualmente pa un serie di workshop cu nan ta organisando. Viviana Lopez Paz, kende ta Secretaria di e Fundacion, a splica cu nan trabou no ta keda na preparacion so, pasobra na momento cu nan yega Hulanda si e hobennan nan mester di ayudo, tambe nan t’ey pa yuda nan den e periodo dificil aki.

Como parti di e preparacion pa e biahe di 2019, Kompas ta organisando algun workshop cuminsamento dia 20 di juni awo cu lo dura te cu 10 di juli. Pa por participa, e studiantenan mester registra. Prome cu e tayer a tene caba un anochi di informacion cual tabata habri pa e studiante y su famia y durante cual a splica kico ta nifica biba y studia na Hulanda. Aunke Kompas a wordo lanta oficialmente na 2018, nan a haci un proyecto Piloto na 2017 caba y for di e tempo ey a sigui amplia nan programa. Den e tayernan di e aña’ki a agrega dos sesion mas di informacion cu ta Mental Health & Personality Training.

E dos hobenan profesional tin 9 aña bibando na Hulanda caba y cu transcurso di tempo nan a bin ripara cu hopi studiante ta keda confronta e mesun problemanan tur aña. Nan no ta caba di adapta nan mes na e bida na Hulanda, Deon Bisslik, Presidente di Kompas a splica. Nan a pone nan experencianan hunto, despues di a combersa cu hopi studiante, pa brinda nan e hermentnan necesario pa ora cu nan yega Hulanda nan ta basta bon prepara pa enfrenta e prome retonan sigur. Por a mira un diferencia entre e studiantenan cu a participa den nan tayernan y esnan cu no a participa. Nan ta sinti un bashi. Por contact e organisacion aki via: www.kompasforstudents.com riba Facebook por haya nan riba Kompas For Students of por whattsapp via: +31633339777

Comments

comments