Stichting EPB ta haci esfuerso pa acomoda graduado di Scol Basico Dornasol

Despues di reclamo cu mayornan di graduadonan di Scol Basico Dornasol a realisa siman pasa na 24ora.com, a acudi cerca Stichting EPB pa asina tende for di nan kico ta e situacion y kico por bay spera. Segun e mayornan, e scol secundario no ta acepta inscripcion di muchanan cu ta bin di Scol Basico Dornasol. 

Di su banda, director di Stichting EPB, drs. Diahnne Lejuez-de Cuba, a duna di conoce, entre otro, cu ta un inscripcion so e scol a ricibi te cu aworaki y cu ta den contacto cu DPS pa obtene tur documento y asina wak con por acomoda e studiantenan aki cu tin mester di un condicionnan special pa atende scol secundario. 

“Nos por tuma nan, pero nos mester wak kico ta e necesidad cu e alumnonan aki mester pa nos por ekipa nos scol tambe debidamente pa por ricibi nan,” asina Lejuez-de Cuba a comenta. E maestronan, por ehempel, no  a bay e training cu e maestronan di Dornasol a bay; e klasnan di EPB ta mas grandi, pero no tin asistent. 

E director a bisa cu mester tene cuenta cu bienestar di e alumnonan y mester tene cuenta cu e esfera di trabou di nos docentenan. “E mester ta un situacion fructiero pa ambos partido. Nos ta bezig ta analisando esey pa wak con leu por yuda e grupo aki, pero cu mester yega na un solucion duradero; sigur cu si.”

E siman aki, ex minister di enseñansa, Armando Rudy Lampe a splica cu prome cu e cambio abrupto di gobierno, el a laga tur cos cla pa cuminsa cu e trayecto di scol secundario pa alumnonan cu caba Scol Basico Dornasol. Sinembargo, e gobierno no a sigui ehecuta e proyecto aki, loke e ta considera un destruccion di capital publico y cu ta perhudica e muchanan.

Pa e relato completo, lesa TREMPAN