Recientemente FAVI y stichting Blinden Massage Nederland a cuminsa cu un curso di massage pa personanan cu limitacion di bista.
E curso aki ta duna clientenan cu limitacion di bista e oportunidad pa bira masahista profesional. Cu e oportunidad aki e posibilidad pa un trabao ta bira posibel. Na e forma aki FAVI ta aporta na e desaroyo di e persona cu limitacion di bista pa asina mira con dispuesto e cliente mes ta pa baydilanti.
Un limitacion di bista no ta un obstaculo, pero un oportunidad pa traha ariba cambionan den bida. Actualmente tin 9 cursista participando, di cual 8 ta di Aruba y 1 ta di Hulanda.
FAVI kier expresa gradicimento sincero na GAMENIGHTGIRLS cu a duna nos e sosten financiero necesario pa e proyecto aki. Nan ta e sponser principal di FAVI. Tambe nos ta gradici tur e otro sponsernan di Hulanda cu a contribui naStichting Blinden Massage, pa nan por a trece e curso Aruba.
Nos kier gradici tambe meneer Paul Vrenken di Stichting Blinden Massage Nederland pa por a haci e curso aki posibel pa Aruba. Paul ta un masahista profesional cu ta duna curso na diferente grupo den e parti di Europa pero tambe Medio Oriente. Cu amplio experticio den duna guia. Ultimo añanan el a cuminsa cu e proyecto di duna e curso pa persona cu limitacion di bista. Exitosamente un grupo di Bonaire ( Zorg& Welzijn Goep) y Curaçao ( Probista) tambe a logra ricibi nan diploma reconoci. Awor ta toca turno na nos clientenan di Aruba.
FAVI ta un fundacion cu vision, nos ta crea oportunidad ora e mundo a bira visualmente scur. FAVI ta duna guia na tur persona cu limitacion di bista di tur edad. Bo kier sa mas di FAVI? Sigui nos ariba nos rednan social Facebook FAVIprimavera of Instagram FAVI_Aruba. Tambe por subi nos website www.favi-aruba.org.
Nos mensahe pa comunidad: Ta bo bista, cuid’e!
