Staring ta demanda Oduber atrobe pa su funcion!

Diaranson aki dos siman, dia 8 di augustus 2018, lo tuma luga un otro caso den Corte, entama dor di Drs. Jerry Staring, Director di Directie Volksgezondheid Aruba. E ta luchando pa su posicion huridico, despues cu Minister Dangui Oduber a prohibi su entrada den edificio di DVG. El a bay Corte y Hues a destrui e decision di e mandatario. Sinembargo, e Minister a manda informa Staring cu e por bay traha bek, pero no den su oficina y no den su funcion. Lo pidi Hues awo un “ordemaatregel” pa obliga e mandatario pa respeta decision di Corte!

Na luna di juni ultimo, Drs. Jerry Staring, Director di Directie Volksgezondheid, a entama un caso contra Gobierno di Aruba y Minister Dangui Oduber. Abogadonan pa Staring ta mr. David Kock y mr. E. Cafarzuza, mientras cu Gobierno a confia mr. Bryan Coffie di bufete Gomez & Coffie cu nan defensa. Hues a dicidi na fabor di Staring y a destrui e decision di Minister Dangui Oduber. Esaki ta un otro caso cu e Minister ta perde, banda di tur esunnan cu Fundacion Lotto pa Deporte a entama contra dje.

Tabata dia 1 di juni 2018 cu Minister Dangui Oduber, via un Decreto Gubernamental, a prohibi Drs. Jerry Staring di drenta Directie Volksgezondheid(DVG) y tur departamento cu ta resorta bou di dje, pa motibo di un investigacion. E Minister a menciona despues den un otro carta cu tin diferente keho contra e Director, cu mester investiga. E mandatario a skirbi’e cu e investigacion lo por tuma 6 siman di tempo. Staring a protesta contra e decision di Minister, dor di entama un caso mesora na Corte di Ambtenaar. A trata e caso aki cu portanan cera.

Hues a dicidi den e caso aki cu Minister Dangui Oduber a tuma un decision sin suficiente motivacion, argumentonan huridico ni tampoco a mara e decision na un temporada. E hecho cu no a scucha Staring prome, ta mustra un investigacion no balansa. Riba dje, e carta di Departamento di Recursonan Humano (DRH) di Gobierno ta sostene Staring den cierto forma y ta sigura cu e acusacionnan di e empleado cu a keha e Director no ta basa riba realidad y e supuesto encuesta cu nan a tene ta subhetivo.

Comments

comments