Minister Dangui Oduber a presenta su vision pa loke ta salud mental (Geestelijk Gezondheidzorg na Aruba presentando un vision di un forma mas integral pa atende cu e tema aki, un maneho unda cu ta reconoce adiccion como un malesa mental. Asina por ehempel tin cuido psikiatrico y cuido di adiccion cualnan ta bay cay bao di un capa, cu ta salud mental.
Judelca Briceño, consehero di maneho di Minister Dangui Oduber y miembro di team di maneho di Departamento di Salud Publico, den un seminario cu a tuma luga na Surfside Marina dialuna mainta, tabata na palabra, caminda cu el a bay mas extenso y intensivo riba e vision di e minister y despues tabata tin un experto cu a bin papia di su experiencia pa loke ta adiccion y su experiencia pakico el a sufri di e malesa aki, caminda cu el a subraya e base familiar como uno hopi importante.
Nos famia, loke nos ta crece den dje, e base cu e muchanan cu ta crece den dje ta hopi importante pa nan desaroyo mental, el a splica.
E principal ta e base, cu ta e cas di famia. Asina cu e ladron drenta horta, ora cu e mara locual ta e doñonan di cas, cu ta mama y papa, asina cu mama y papa stop di vigila, ta hopi peligroso pa e muchanan, pasobra loke ta e droga, cu ta e ladron, por penetra na cierto momento, cuminsa horta bo famia, segun Juan Feliz, Experto riba adiccion a splica.
Ta hopi importante pa e mayornan vigila nan yiunan cu kende nan ta cana, unda nan ta bay, kico nan ta haci. Un mucha yega na bo cas, abo como mayor no bis’e pa e cera su boca, pasobra e ta haya miedo di bo.
Unabes cu e mucha keda keto y cera, e no lo confia ningun hende mas, esey lo ta hopi peligroso. Nos ta den un tempo cibernetico, ta miho laga bo telefon un banda y duna bo yiu atencion. Loke bo alimenta bo yiu cun’e, esey ta loke e ta den futuro.
Si na cas tin alcohol, tin vicio, tin pleito, esey ta loke e yiu ta bay haci mañan pasobra esey ta e forma cu el a mira con cosnan ta. E edad di 7, 8 y 9 aña ta peligroso pa mucha. Ta edad cu ta retene cosnan den su mente y mester wak kico ta planta den su mente. “Planta flornan bunita. No planta matanan di sumpiya, pasobra mañan e lo por afecta e mucha hopi y e por coy rumbo robes.”
Rafael Lopez, hefe di departamento di SPD (Sociaal Psychiatrische Dienst) di DVG, te cu september, taa splica cu esey ta e departamento cu semper ta duna tratamento na personanan mayor di 18 aña. A cuminsa cu un team pa duna tratamento na mucha y hobennan cu problema psikiatrico, comportacion y drogadiccion of adiccion en general.
Tin diferente plan cu ministerio di salubridad a bin cun’e, adaptacionnan cu kier a haci entre otro con pa yega na traha hunto cu tur e otro instancianan riba tereno di salud mental. Aworaki ta traha apart. Den caso di SPD ta cuminsa cu servicio 24 ora pa dia. Pero pafo di ora di oficina, ta hopi dificil pa por yega na e otro instancianan pa por trata e persona hopi lihe.
Awo mester haci hopi pregunta, si e persona a bay dokter di cas, si el a bay Respaldo, of otro psikiatra/psicologo. Tur esakinan prome cu SPD actua. Mientras tanto tin registracion central. Un di e plannan di e minister ta pa SPD por actua pa duna tratamento adecua, lihe y eficiente.
Ta invita tur instancia cu ta trata pashent riba e tereno di psikiatria y adiccion. E idea tabata pa sinta hunto y brainstorm. Naturalmente ta un vision di cinco aña largo, segun Briceño, con pa yega y realisa e vision di e minister. Tur stakeholder ta bay sinta hunto y ta bay papia riba kico ta e vision y con pa yega na dje conhuntamente.
