Stacionnan di combustibel a cera cuenta di Serlimar y trucknan no por a tank

1470

Personal di Serlimar, kendenan den oranan di marduga a bay tank trucknan pa brinda servicio na comunidad, a topa cu un noticia poco amargo. Cuentanan di combustibel di e compania ta blokea.

No ta prome biaha cu nan ta confronta problema ora di coy combustibel pa e trucknan, pero e biaha’ki e cuenta a keda blokia.

Segun por a compronde, mas cu un biaha a adverti na gerencia di SERLIMAR cu e debe na e gasolin stationnan ta demasiado halto. Na momento cu e empleadonan a bay tank marduga, e debe tabata laba den ¾ miyon florin. Segun por a compronde, e compania tin casi un aña sin paga ni un depchi riba e facturanan habri.

Cada biaha cu atende e director riba e asunto aki, e ta bin cu un storia bunita y ta bolbe duna e compania estatal otro chens. Pero ta parce cu e biaha’ki pasenshi di e operadornan a caba.

Ta debi na e situacion cu a surgi, cu a hinca gerencia di e empresa den un skina, cu e director a dicidi di core paga algo pa logra cu ta habri e cuenta. Sinembargo e suma paga no ta mucho cos.

Tur hende ta na altura pa awo cu e situacion financiero di SERLIMAR ta desastroso. E Hunta encabesa pa Giovanny van Wijk, kende ta un aliado di ex Minister Otmar Oduber, y hunto cu e dos directornan Marelva Wever y Henley Davelaar, ta esnan cu mester a garantisa bon maneho na Serlimar. Enbes di protege e compania, a presta nan mes pa nan wordo uza door di e tempo ey Minister Otmar Oduber, kende a gasta placa di SERLIMAR riba cosnan innecesario. Ora cu e Minister a mira cu e no ta bay logra pasa su ley y a premira e desaster na caminda cu SERLIMAR, a dicidi di bandona Gobernacion. E tabata sa exactamente kico tabata na caminda. Otmar Oduber kier a pusha e ley sin duna cuenta na Parlamento riba e maneho financiero. E tabata kier pa ciegamente Parlamento aproba e ley pa malgastamento di placa di Serlimar por sigui, pero el a perde e bataya.

Mientrastanto e debe na fuel pa e trucknan move, no ta e unico debe cu tin. Serlimar tin debe tur caminda y por hasta spera cu ta bay pone beslag riba nan. E empresa tin debe di riba un miyon florin na un solo compania cu ta brinda servicio na SERLIMAR y cu ta liga na e actual gobernacion.

Hasta primanan social cu mester cumpli cu nan na caha di Gobierno, no ta pagando. Mientras cu ta pone presion riba pueblo, SERLIMAR debe miyones na impuesto. A haci inversion den trucknan sin ta necesario.

Danki na e mal maneho na Serlimar na man di e Hunta nombra pa e Minister di POR y tambe e dos directornan Davelaar y Wever, a causa cu placa a wordo uza pa proyectonan liga na sponsernan di e partido.

Awe Oduber a bay lagando e compania den un debacle financiero cu dificilmente e lo por sali di dje. Penalmente e directornan lo ta responsabel pasobra nan mester a cuida interes di e compania y no loke nan Minister tabata “kier”.

E mandatario a haya miyones aproba door di Parlamento na 2018 y 2019 den presupuesto pero e trahadonan no a mira ningun adelanto den nan salario. A lubida riba e e compania y trahadonan, mientras cu uza e placa den cosnan innecesario.  

Fin di aña mester a pidi Parlamento 2 miyon florin pero a haya 800 mil pa por cumpli cu e trahadonan. Te awe ainda tur hende ta wardando relato financiero di maneho na Serlimar.

Mientras cu SERLIMAR no tin placa pa pone diesel na su trucklnan, nan ta coy placa pa sponser  festival y otro eventonan di carnaval. Hasta bashi premie cu e empleadonan mester a haya, a confronta problema cu e pago. Mester a pone presion pa nan por a haya e pago aki, algun dia despues dii e fecha manera tur otro hende a hay’e.

E incinerator cu a costa miyones ta tira na dump ainda sin cu e ta wordo uza y a costa miyones. Djis pa duna e proyecto aki na un sponser, di un forma cuestionabel. Awe e mashin ta para sin uzo pa varios luna caba.

Coalicion cu a bisa cu nan ta diferente, parce ta na soño, pasobra no ta haciendo nada. E situacion a bira asina malo cu trahadonan ta firmando carta pa retira e director cu no a haci nada pa e compania, solamente pa su mes y e Minister.