Faltando algun minuut pa 3’or di atardi a cuminsa un accion di trahadonan di ELMAR pa mustra nan malcontento cu gerencia di forma unilateral a kita e luna aki caba 12.6% di nan salario. Sindicato a pidi gerencia pa hala e decision aki atras, te ora cu yega na un acuerdo cu a negocia riba dje.
A pone un ultimatum pa awe pa un contesta riba nan peticion.
Raymond Maduro, di sindicato ALVAST, a bisa cu nan problema ta cu a kita e suma di nan salario sin cu tabatin un consensus. For di aña pasa, el a bisa, cu tabatin un acuerdo cu gerencia di ELMAR cu boluntariamente ta entrega e 12.6% te cu december. E aña’ki sinembargo a bisa cu ta bay contribui pero e mester bini di tur hende. E ta mas na fabor pa bini cu un ley unda cu delaster empleado ta contribui na e situacion, no awor cu ta enfatisa hopi riba aparato di gobierno y NV-nan.
Diego de Cuba, si sindicato STA, ta sinti cu e expresion cu prome minister a haci di e grupito di ELMAR ta un falta di respet. Ta papia aki di un derecho cu gerencia ta trapando. Aña pasa a entrega y a firma un protocol cu a finalisa na december 2020. Pero e aña’ki abruptamente ta bin kita e 12.6% sin negocia esaki. A djis informa y kit’e. Solamente pasobra Hulanda a bisa esey. E kier sa for di e gobierno si ta tur loke cu Hulanda bisa, e gobierno di Aruba ta haci.
Pa loke ta salario halto, de Cuba a bisa cu ta personanan cu a traha masha hopi aña cu ELMAR y a acumula e salario cu nan a yega na dje. Trahadonan di ELMAR ta traha cu cierto riesgo, cu por trece morto cu ne. E ta un trabou peligroso. “Nos no por comparti e pensamento di prome minister pa loke ta salario di trahadonan di ELMAR. Gerencia di su banda a bay un tiki leu. Nunca nos a nenga di ta solidario. Pero e forma abrupto cu a bin cu esaki tin nos molestia. Mester negocia pasobra si ta baha salario, mester traha oranan menos. Pero nada di esey a negocia.”
Awe e sindicato a haya un carta cu ELMAR ta pone sindicato STA responsabel pa e accionnan cu e trahadonan tuma.
De Cuba a bisa cu si bay Corte, ta gana e caso. Hues lo bisa cu tin acuerdo y mester sinta na mesa negocia. Pero e ta kere cu e cos aki tin un asunto mas profundo. E ta sinti cu kier haci e trahadonan di NV-nan un sistema di “cheap labour”. Di otro banda ELMAR no a haya nada di subsidio di salario, nan mes a wanta tur e golpi. Si ta dictadura kier, anto esaki lo caba den un rato, e sindicalista a bisa. “E storia aki por caba lihe.”
Pa loke ta Utilities, e ta bisa cu nan no ta mira e necesidad pa su existencia. E ta simplemente un Hunta di Comisario pero niun trabou ta haci.
Awor STA ta bay busca intermediacion di Mediador di Gobierno pa pone gerencia sinta na mesa y negocia.
Casonan similar ta tuma luga na Arubus y na WEB, unda na e ultimo aki SIWA a bisa di lo hiba e compania Corte.
