Keto bay e sindicato STA no por yega na un acuerdo den e negosacion pa un contracto colectivo (CAO) nobo cu e compania ASTEC. Diadomingo atardi nan a topa cu Minister di Labor, Glenbert Croes na Aeropuerto, net prome cu e mandatario a sali rumbo pa Hulanda pa reunionnan di trabou.
Presidente di STA, Diego de Cuba, a splica cu a elabora cu e mandatario riba e retonan cu tin pa cu negosacion na ASTEC. A repasa cu e mandatario e diferencia di locual nan a demanda y locual cu e compania a ofrece na paga. Pa e trahadonan, e proposicion cu ASTEC a pone riba mesa ta inaceptabel.
STA a sigura cu Minister Glenbert Croes a mustra comprension pa nan preocupacion y nan demanda. Unico cos cu el a splica e sindicalista cu e tabata saliendo pa Hulanda y asina e regresa dia 26 di maart e lo convoca un reunion pa sigui atende e problema aki y otronan. Bou di otro problemanan tin tambe e leynan laboral, specialmente na Aeropuerto y na Waf unda tin abuso tumando luga.
A funda Sindicato di Trahadonan di Aruba (STA) desde aña 1964. E tempo ey como “Gouvernements Arbeiders Bond Aruba” pues GABA y cu tempo a cambia pa STA. E Presidente actual ta Diego de Cuba, cu a tuma timon di e sindicato over na aña 2009 ora nan tabatin solamente 2 compania afilia. Despues di 9 aña, awe e sindicato ta conta cu 49 compania afilia cu mas di 1200 miembro, haciendo nan un di e sindicatonan di mas grandi di Aruba. Nan ta representa un cantidad di miembro den sector priva, den Gobierno y hasta den companianan priva di Gobierno.
