Diabierna e Sindicato STA a anuncia un accion general dialuna na nos compania nacional di transporte publico, esta ARUBUS. A planea un reunion desde 4:00am y a bisa mesora cu lo no tin bus disponibel pa hiba muchanan scol ni pa hiba ningun hende trabou. E menasa aki a cambia awe diasabra, despues di un reunion cu Hunta di Supervision di e compania.
Den oranan di atardi Diego de Cuba y Minister Chris Romero a laga sa di a yega na un acuerdo y cu e accion no lo continua. E mandatario a pidi su Comisarionan pa interveni y nan a reuni pa 2 ora y mey cu e sindicato pa alcansa un acuerdo.
E problema principal ta e estado den cual e busnan ta awor, cu tabatin como consecuencia cu un bus a kima den careda diabierna mainta. E sindicato ta preocupa cu si tabatin mucha of hende grandi den e bus, si nan no por a mobilisa mes lihe cu e chauffeur, di kico lo por tabata e resultado.
Di otro banda, nan a sigura cu e Hunta di Supervision, encabesa pa Edwin “Eddy” Mohamed, a mustra comprension y cooperacion pa corigi e situacion y pa garantisa cu solamente e busnan den miho estado lo aubi caminda por lo pronto. Arubus y STA ta riba e mesun liña cu mester evita un otro situacion similar pa no hinca ni e chauffeur y ni e pasaheronan den un peliger innecesario.
