STA a bari y mop den referendum na aeropuerto

2098

Despues cu algun luna atras trahadonan disgusta den un referendum a duna Federacion di Trahadonan di Aruba (FTA) e confiansa pa representa nan. Tur cos tabata bayendo bon y inclusive Sindicato di Trahadonan (STA) a pidi un referendum y a organisa esaki.

Tur cos ta mustra cu FTA lo bolbe haya e confiansa pasobra a gana e prome referendum sin problema. Sinembargo e situacion di coronavirus unda sindicatonan mester a sinta na mesa cu gerencia di Triple A, unda a pidi sacrificio di trahadonan. E mishimento cu e CAO aki ta loke a costa sindicato FTA e referendum di awe. STA a bolbe cas y a haya representacion di trahadonan un biaha mas.

Trahadonan di Triple a duna confiansa bek na STA, a bay cas bek

Posted by 24ora on Thursday, May 28, 2020

Un poco prome cu 3’or ya caba tabatin un resultado parcial cu ta mustra cu mayoria a bay pa STA. Tur cos ta mustra cu e ahuste no a cay na agrado di e empleadonan di aeropuerto.

Diego de Cuba, Presidente di STA, a bisa cu semper nan tabatin confiansa y e ultimo referendum tabata cu e empleadonan tabata confundi y tabatin un campaña hopi baho contra su persona. “E campañanan sushi ey no ta paga. Nos a cuminsa cu e referendum di 8’or di mainta y for di cuminsamento nos a haya confiansa bek.”

De Cuba a bisa cu awo Triple A no tin alternativa pasobra a tene 5 referendum y STA a bari y mop den tur. “Awe nan terkedad a caba. No por t’asina cu un compania tin un contracto y ta bulldoze den esaki y no ta papia debidamente cu e empleadonan. Ora bo actua asina, e trahadonan ta castigabo.” Den e crisis aki, segun e ta bisam gerencia ta cortando sin piedad den tur cos y hasta den bonus di Pasco y e otro sindicato a simplemente para mira tur cos pasa.