Den combersacion cu Pedro Vera, director di Caledonia y gerene di e proyecto di St. Regis Aruba cu e meta di informa riba construccion di e hotel, e acceso publico na e beachnan y e oportunidadnan cu presencia di Sr. Regis ta trece cu su presencia aki na Aruba, tanto pa turismo como pa e comunidad.
E proyecto di St. Regis ta un hotel di hotel cu ta consisti di 200 camber, 22 condo, casino, spa, restaurant specialisa y ‘three-meal restaurant’. E areanan di piscina ta amplio y lo wordo construi na rand di e parke publico cu lo keda publico semper.
El a splica cu tin un palabracion cu Gobierno pa haci renobacion di e parke; lo rediseña e parke completamente pa e sigui ta accesibel pa publico. Esaki ta inclui un warda nobo di Polis, area pa cana y ta amplia e area di parking. E beach dilanti di e post di Polis, mescos cu tur beach na Aruba lo keda publico.
E ehecutivo hotelero a splica cu durante e construccion y despues, henter e area berde cu ta dilanti di e hotel cu, aunke cu e ta riba tereno propiedad di e hotel, e ta keda integro y ta forma parti di resto di e paisahe. “e hendenan di Aruba por sigui disfruta di dje pasobra e ta parti di e area, mescos cu tur e otro hotelnan na Aruba, habri na e parti dilanti y tambe e vegetacion cu tin di e otro banda.”
Vera a splica cu ta bay trata di molestia menos posibel e hendenan cu ta haci uzo di e beach, ya cu no ta yega e banda ey durante e periodo di construccion di e hotel. Pero si lo tuma e medidanan di siguridad na momento cu lanta e edificio, pa loke ta e distancia cu mester tin entre un structura y e muraya di e propiedad; pero tur cos di acuerdo cu e normanan di DTI y DOW.
Pa loke ta e hotel mes, el a splica cu e diseño ta uno yamativo, ya cu e tin cualidadnan diferente na tur e otro hotelnan. Ora cu drenta e lobby, tin cu subi mas o menos dos meter y mey prome cu bolbe baha pa yega na e area di tres piscina infinito. E ta permiti pa tur e huespednan mira e lama for di e area di piscina. “Esey ta haci cu e hendenan no ta bay haci tanto uzo di e beach. Di tur manera, e turista cu ta bini Aruba no ta haci tanto uza di e beach, mas cu tur cos nan ta prefera e piscina; aunke cu nan tin tin bista pa lama,” Vera a indica.
St. Regis Aruba lo tin 200 camber, incluyendo dos suite presidencial y 15% timeshare. Adicionalmente e ta conta cu 22 apartamento di 2 y 3 camber, cualnan tambe ta suite. E diferencia ta cu e apartamentonan tin e facilidadnan di cushina y wasmachine, cu ta algo tipico di hotelnan St. Regis. Pa tin e apartamento integra cu e hotel ta importante pasobra tin huespednan, principalmente esnan di Merca, cu ta desea pa yega na un apartamento y no solamente un camber di hotel.
Na e momentonan aki nos no por ofrece esaki na algun hotel y y mester bisa cu e apartamentonan, aunke nan ta esey, ta parti di e hotel, y di acuerdo cu e convenio cu Gobierno, ta prohibi biba den nan. Solamente e ta wordo ofreci como un servicio adicional di un camber comun.
Pa loke ta e areanan publico, e cancha di basketball ta forma parti di e parke. Simplemente nan ta bay reconstrui esaki pa mehora e area di stacionamento y hacie mas grandi. Inclusive, e areanan di cana, e warda di polis y e facilidad pa e autobusnan por pasa y baha e muchanan cu ta bay tuma zwemles.
“E parti di scol di natacion ta keda, pasobra nanta desea di keda eynan y a combersa cu nan. Simplemente ta drecha e fachada pa integra esaki na esun di e hotel. E idea ta pa nan keda di mesun estilo, tanto den e parti landscaping como hardscaping …..”
E construccion a cuminsa caba y lo finalisa e structura pa fin di aña, cu e apertura programa pa e ultimo trimester di 2022.
E yegada di St. Regis na Aruba ta representa un progreso pa e isla, ya cu ta bay uza 100% personal local. Pa e parti di ehecucion ta trece lo minimo di pafo, pa funcionnan specifico. “Nos no tin ningun permiso di parti di Gobierno pa trece hende di afo, ni nos ta desea esaki; nos ta bay uza hendenan local, y e hendenan cu ta bin di afo ta masha tiki mes. Loke cu ta standard pa tur e hotelnan, manera manager y controlador.”
E compania kier general trabou pa e hendenan, trabou sigur y di largo plaso; oportunidad pa e hendenan cu kier traha haci un carera cu un cadena manera Marriott, cu ta e marca hotelero mas grandi di mundo cu mas di 6 mil hotel rond mundo. Mas di un miyon di camber y mas di 100 miyon di usuario frecuente y esaki ta algo importante pa e isla.
Finalmente, Vera a expresa cu “no ta cualkier marca loke ta biniendo. Aruba ta serio, cu e construccion di St. Regis, e unico isla den Caribe, pafo di e teritorio Mericano, cu tin un St. Regis y un Ritz Carlton. “No tin ningun isla den Caribe cu tin’e. Puerto Rico tin, pero e ta teritorio Mericano.”
