St. Franciscus College tin un tipo di alerta, un tipo di extra atencion pa loke ta siguridad di e studiante. Ya caba autoridad ta na altura di dje. Sigur ta un informacion cu pueblo di Aruba mester sa. Ya caba mayornan di un di e hobennan cu a pasa den un susto, lo por a bati na porta di autoridad.
Un di e personanan cu ta na altura di e caso aki y ta mandando un mensahe tambe pa e comunidad di Aruba.
E ta conta cu ta haya esaki hopi preocupante, vooral pa e muchanan di scol y den bario. Ta algo cu bo no por keda keto. Bo tin cu trec’e dilanti y pa evita pa algo malo por pasa cu e muchanan.
Den e caso aki tin un alumno di e scol cu na caminda pa e scol, no mucho leu di su cas, a wordo acerca pa un individuo y na un manera tactico el a bisa e hoben cu ta su mayor a mande pa dun’e un lift pa bah’e na scol.
Na prome instante e mucha a para keto y a keda pensa, pero despues el a bin bij y a bisa cu esaki no ta algo bon. Despues e persona a yam’e, unda cu el a bira wak y a nota su parti intimo. E mucha no a basila, a core crusa caya y bay den un otro grupo di mucha canando na caminda pa scol.
Di biaha a yama polis. KZP ta na altura, mayornan a haci denuncia. No solamente pa divulga esaki riba facebook, pero ta importante pa yega na polis y haci denuncia. Scol tambe di biaha a manda carta pa mayornan, pa ta alerta ora cu muchanan cu ta cana bin scol y tin biaha ta djis un bocht e muchanan ta cana nan so. E hoben en cuestion no ta un mucha chikito, sino un hoben di 12, 13 aña. A pidi e mayornan pa e muchanan sali compaña. Mainta e scol ta habri su portanan pa 7’or. Tin mayornan cu ta cuminsa 7’or y ta purba di coopera te unda cu por pa e muchanan n keda pafo di scol. Y na final di Pleinwacht cu ta keda te ora cu e ultimo mucha bandona tereno di scol. Ta pidi tur persona ta alerta pa ora mira un auto straño circula banda di cas of banda di scol. Tambe na e muchanan pa no acerca ningun hende straño, no drenta den combersacion y tambe pa ta alerta. Esey ta hopi importante.
E alumnonan lo mester conoce e persona. Esey ta sigur. E persona tabata tin un auto bruin ta core di cuater porta. Tabata un persona color cla, cabey preto, barba shinishi. E persona aki por cambia su apariencia rapido, por cambia auto. Ta djis cu ta pidi mayornan papia cu e muchanan, pa concientisa nan di esaki y pa no acerca ningun persona y pa tin un codigo cu bo ta bisa cu si berdad e mayor a manda un hende, e mucha mester ta na altura cu e mayor y yiu sa, cu e persona no tin. Algo fastioso por pasa hopi lihe. Pa ni basila, gewoon cana grita y pidi ayudo y acerca un persona.
E forma di manda mensahe
E mensahe aki a bay cerca e scol bisiña di biaha. Mayornan tambe mester sa cu pa por fabor, ora muchanan ta keda cas, ta hopi importante pa mayornan informa scol. Den caso cu e muchanan ta cana bin scol y si no a yega scol pa cualkier motibo, scol no ta na altura si e mayornan no avisa. Den un caso asina, si algo sosode na caminda pa scol y ta te 1’or or e mayor bin busca e mucha na scol y e mucha no a bin mes, ta hopi ora lo a pasa. Pesey e scol tambe tin un carta cu a bay cas. Scol ta traha hopi di cerca cu bureau leerplicht caminda cu scol ta avisa di biaha ora muchanan ta falta scol regularmente.
E trauma
E studiante tabata hopi agita, hopi nervioso. Di biaha ora el a yega, e no por a papia mes. A pasa un tempo largo pa ora e por a bisa kico a sosode, pasobra e no por a papia. Di biaha cu el a yega, el a bin na yoramento scol. E momento ey e no por a saca un palabra. Despues cu el a calma, el a conta su docente kico a pasa. Di biaha a tuma contacto cu polis, cu a bin di biaha scol. Nan no a basila. Nan a reacciona mesora, cu a duna e mucha toch un trankilidad cu el a wordo scucha. Awo ta keda na autoridad pa haci algo pa esaki.
Nos leynan tey, pasobra tin algun di e hendenan aki cu tin cierto patronchi di comportacion y mester reforsa ley pa asina pone e hendenan aki mas tempo tras di tralie.
Tin trankilidad
E docente y muchanan ta trankil awor aki. Cura ta full cera. Porta ta cera ora tur mucha caba di yega. Siguridad ta hopi importante. SKOA ta traha tambe riba e parti di siguridad pa e muchanan y tambe sigur pa e maestronan.
Polis sa ken e sospechoso ta
E pedofiel ta move den e area y ta busca manera pa haya su prooinan, ora cu e muchanan ta na caminda pa scol. For di autoridad a bin haya sa, cu e persona aki nan sa ken e ta. Den cualkier momento e persona aki lo wordo deteni. No ta un cara desconoci pa husticia. Su historia ta conoci y pronto lo pone man riba dje pa e duna cuenta di loke ta pasando, y asina mantene pueblo y tambe area di scol na un forma mas safe posibel, pa motibo di un hende cu ta un pedofiel, cu ta moviendo rond di scolnan tempran, na momento cu e muchanan ta na caminda pa scol.
