Ta practicamente un aña pasa cu centro di rehabilitacion Cas Speransa Nobo – un iniciativa di HopeAruba Fundacion Restauracion den colaboracion cu Global Teen Challenge – a habri su portanan aki na Aruba cu su Director ehecutivonan Sr. Shawn & Sra. Shanon Blankenship.
E pareha Blankenship di Global Teen Challenge procedente di Merca tabata tin e tarea inicial pa funda e centro cu ta opera bou di e curiculo di e organisacion global aki, como tambe ekipa yiunan di tera pa tuma e maneho over dentro di e periodo aki.
Awor entrante prome di juni 2018, Cas Speransa Nobo a instala su prome Director local kende ta Sr. Rafael de Cuba. Un comerciante conoci den nos comunidad y gerente di Heaven’s Hair Studio kende lo hiba maneho di e centro.
“Nos ta masha contento cu Cas Speransa Nobo awor tin un director local na cabez. Nos tin gran confiansa den su capacidad pa dirigi e centro na su sigiente nivel. Sr. De Cuba ta laborando cu nos den e obra aki pa e ultimo 3 aña caba y e ta haci esaki cu gran pasion,” Sra. Lisette Malmberg, Presidente di HopeAruba Fundacion Restauracion a bisa.
Desde inicio di e centro Sr. De Cuba ta un miembro di directiva activo, como tambe ta dirigi e programa di Outreach di e fundacion pa e ultimo 3 añanan. Un programa cu ta den operacion pa 15 aña caba, unda un ekipo completo ta percura pa fondo, haci compras, cushina y bay duna e alimento, como tambe cariño na adictonan ambulante den area di Rancho.
Sr. De Cuba recientemente tabata na Honduras, Centro America unda el a wordo certifica pa e programa di Global Teen Challenge, hunto cu 23 otro lider procedente di 7 diferente nacion. Global Teen Challenge ta un organisacion global cu ta mobilisa hende y recurso pa pone speransa na alcanse di cada persona adicto na substancia, cu un presencia den 120 pais y mas di 1300 centro.
“Nos ta hopi contento cu e colaboracion entre HopeAruba Fundacion Restauracion y Global Teen Challenge y inmensamente gradicido na e pareha Shawn & Shanon Blankenship, kendenan a laga nan hogar, famia y lugar di comfort atras pa henter un aña pa inverti tur nan experticio pa haci un diferencia den nos pais, nos hendenan y generacionnan lantando cu di un of otro manera ta wordo impacta for di nan sacrificio,” Sra. Malmberg a bisa.
“Tabata tin semper e deseo di por trece solucion na personanan cu problema di addiccion cu ta controla nan bida. Y nos, añadiendo nos mes na institucionnan cu t’ey caba, ta fortalece e lucha contra e problema existente. E ta manera e dicho ta bisa; union ta haci forsa. Segun e problema a aumenta den nos sociedad, nos mester a bin cu strategianan nobo, unda nos a dicidi di bay y presenta nos mes caminda cu nan ta. Pa 15 aña nos a alimenta y duna speransa na esnan adicto na substancia, pero awor nos tin un institucion – Cas Speransa Nobo – unda nos por brinda mas cu alimento y cariño pero awor tambe un dak cu un programa di rehabilitacion holistico cu oportunidad na un bida nobo,” De Cuba a bisa.
Pa awe tin e pasion pa haci un diferencia den e bida di esnan adicto na substancia y awor tuma cargo di e centro como Director no ta djis un oportunidad comun cu a presenta Sr. de Cuba pero uno, cu mas bien a bin cu un costo hopi halto. “E pasion aki ta uno cu ta bin di experiencia. E ta un cos pa bisa mi ta bay yuda un hende pero e ta otro pa sa kico ta come y bebe di e bida aki. Mi tabata un adicto y a biba un bida adicto na substancia pa mas di 16 aña. Pero awe, mi por bisa cu pa motibo di a somete mi mes na un proceso di disciplina y educacion, mi ta hibando un bida liber di adiccion pa 12 aña caba. Mi ta hiba un bida completamente transforma y sana den mi identidad.”
E ta añadi cu e problema ta grandi, “Tin mama y tatanan cu ta luchando pa añanan largo cu un yiu pero porta pa berguensa y temor no ta busca solucion. Si esaki ta abo y bo a discubri cu bo yiu ta adicto na cualkier substancia busca pa conoce mas y pa yudele,” De Cuba a clausura bisando.
Cu un entrevista visual actualmente den produccion, pronto De Cuba lo ta compartiendo su testimonio completo cu comunidad di Aruba. Pa haya sa mas tocante e centro por subi nan pagina web www.cassperansa.org.
