Spuiters MIPA ta derota Macuarima Spark Elektra den AA

Campeonato Heineken fast pitch di Aruba Softball Bond dedica na baluartenan Jacobo Jansen y Gilbert “Nando” Maduro a continua riba veld di Dragon Hitters na Barcadera. Den categoria AA e dos rivalnan Spuiters MIPA di Sabana Grandi a topa e muchanan di Macuarima Spark Elektra.

Spuiters bou maneho nobo di e legendario Johannes Poy Flanegin e aña aki a Sali y mustra cu mester tene bon cuenta cu nan. Doño di equipo Spuiters MIPA Sr. Henk Arnold a dicidi di  lanta un equipo nobo “White Joker” y e aña aki Henki lo keda A-Klas pa desaroya muchanan pa su farm system.

Angelo Arnold a start pa Spuiters MIPA y a cubri henter e ruta pa pone e promer victoria riba su nomber. Juan Chirino tambe a bay ful e ruta pa Macuarima pero mester conforma su mes cu e derota. Mester remarka cu Spuiters a rally den promer inning acompaña pa dos error y a anota 5 careda y di eynan Chirino a preta brasa y no a permiti mas careda. Spuiters como equipo a bati di 22-4 pa un averahe di 182.

Macuarima como equipo a bay di 19-4 pa un averahe di 211. Spuiters MIPA 5 careda, 4 hit, 0 error. Macuarima Spark Elektra 2 careda, 4 hit, 3 error. Angelo Arnold ta tira 30 bola, 47 strike pa un total di 77 lansamento permitiendo 2 careda limpi propinando 5 ponche crema y ta regala 2 base por bola pa un era di 2.80. Juan Chirino 22 bola, 55 strike bon pa 77 lansamento permitiendo 2 careda limpi propinando 4 strike outs y no ta regala base por bola pa un era di 2.80. Pues un pitcheo hopi balansa pa ambos banda.

Mihor bateadornan pa Spuiters MIPA ta Reison Alvarado, Alexander van de Berg y Gerald Werleman tur di 2-1. Gerald ta conecta porcierto un triple. Deyon Peterson a bay di 3-1. Pa Macuarima Spark Elektra Edgard Flanegin, Ray Bernabela ambos di 3-1, Leonard Geerman di 2-1 y Randolph Pinedo  di 1-1. Dialuna awor campeonato ta continua na Pos Chiquito cuminsando pa 715pm den categoria A-Klas Blackhawks lo topa Piratas mientras pa 9pm den categoria AA Royal Power lo midi forsa contra campeon di A-Klas 2018 kendenan a promove pa AA esta e muchanan di Esy Kelly Celebrities. Fanaticada di softball jega tereno bin apoya bo equipo preferi!!!

Comments

comments