Desde dialuna Hospital ta confrontando problema cu nan sistema di computer despues cu a constata un movecion straño den e netwerk di Hospital. A conclui cu e netwerk di Hospital a ser infecta cu un virus cibernetico. Door di e situacion aki no tin acceso na e sistema y pues di biaha a bay over na e proceduranan manual cu ta consisti di entre otro registra tur informacion di pashent manual. Actualmente ta trahando duro pa drecha e sistema lo mas pronto cu ta posibel.

Ta importante pa realisa cu awor cu tur informacion di pashent ta bay di forma manual ora di consulta cerca dokter of na cualkier otro departamento di Hospital. Pues e bishita por tuma mas tempo cu normal consecuentemente ora di espera por bira mas largo.

Ta pidi pashentnan colaboracion na momento di bishita Hospital of cualkier policlinica pa trece remedinan of pasa botica y busca lista di remedi actual. Na e momentonan aki Specialistanan no tin acceso na historia medico y si en caso ta necesario ta pidi pa un miembro di famia compaña e pashent cerca dokter pa informa lo necesario di e historia medico.

Tambe ta pidi tur pashent pa no bin Departamento di Emergencia si berdaderamente no ta un caso di emergencia. Si por bay dokter di cas of dokter na warda por fabor haci esey mirando cu ora di espera por ta mas largo cu normal na Departamento di Emergencia.

E situacion actual ta pone tambe cu lo por pospone e.o. bo operacion, test of scan. Ta compronde cu e situacion actual no ta deseabel pero esaki ta necesario na e momento aki pa por garantisa bon cuido di pashentnan.

Comments

comments