Awe tardi, durante un conferencia di prensa na Mangel Halto, Minister di Infrastructura y Medio Ambiente, drs. Marisol Lopez-Tromp a atende e asunto di tiramento di pisca, of manera ta yam’e na Ingles “spearfishing”. Ministernan Andin Bikker y Chris Romero a bisa cu nan ta di acuerdo cu un cambio den ley pero cu nan dos ta sperando pa Minister Marisol Lopez-Tromp firma e decreto. E gobernante a aclaria awe cu no ta asina cu por cambia ningun ley den un decreto. E dos Ministernan ey mester cambia ley den Parlamento y esey nan NO a haci!
Hopi ta esunnan cu a vocifera nan anhelo di sigui practica e deporte di spearfishing pero tambe ta consciente di e hecho cu ta un deporte prohibi pa ley. A tuma nota cu dos Minister colega lo a comunica den prensa cu nan lo tin algun tempo caba ta traha riba un concepto, un cambio di ley cu e excepcionnan cu ta desea di haci, enfoca riba esunnan cu ta uza spearfishing como nan manera di biba, cu ta nan cuminda y ta depende di dje. Tabata un situacion cu pa hopi aña nunca a haya atencion.
Informacion cu Minister Lopez Tromp no kier firma no ta corecto
Den medio di comunicacion por a tuma nota di informacion robes, caminda ta indica cu Minister Marisol Lopez-Tromp lo no kier firma pa un cierto documento keda cla pa permiti spearfishing. Esunnan cu ta practica e actividad aki di nan banda tambe a cuestiona e mandatario y pa e motibo aki mes a bin dilanti pa aclaria e ponencia aki.
Como Minister di Medio Ambiente, e ta e prome yama pa percura pa respeta leynan como tambe tratadonan internacional cu Aruba ta forma parti di nan, pa loke ta naturalesa y medio ambiente. Consecuentemente si kier bin cu cambio den e ley, manera cu e ta, e caminda indica ta pa haci esaki ta den Parlamento di Aruba caminda ta discuti eventual cambionan proponi pa tuma desicion a base di consehonan y locual ta posibel.
E mandatario ta enfatisa cu na e momentonan aki no tin tratamento di ningun ley den Parlamento.
Locual cu Minister di Husticia mr. Andin Bikker como tambe Minister di Agricultura Chris Romero a trece padilanti, mirando e situacion di Covid-19, nan ta desea di bin cu un maneho pa tolera spearfishing tuma luga y den e caso akinan a stipula un sorto di nota di maneho (un gedoogbeleid) y e documento aki enberdad ta locual nan a haci peticion pa Minister Lopez tromp pone su firma bou di dje. Sinembargo e mandatario a remarca cu pa introduci un gedoogbeleid riba su mes y prome cu e mandatario pone cualkier firma bou di un documento, ta pidi conseho riba dje, specialmente na Departamentonan manera entre otro Directie Natuur en Milieu como tambe Comision Flora y Fauna pa asina haya nan opinion riba e excepcion cu e coleganan kier haci.
Den cuadra di esaki a reuni cu nan, caminda e prioridad riba mesa ta pa proteha flora y fauna pero tambe parkenan marino como tambe piscanan proteha. Sinembargo a trece tambe padilanti cu si acaso lo kier haci un excpecion, algun piscado cu ta activo den e practica di spearfishing como profesion y/of ta depende di esaki pa trece pan riba mesa, lo tin cu mara nan mes na algun condicion cu lo tin cu stipula, manera por ehempel e grupo mester ta bon defini, ken nan ta, registracion y algun condicion mas cu e director di DNM lo anuncia.
Debi cu e condicionnan aki no ta stipula ni ancra como tal den locual a trece padilanti, naturalmente e ta keda habri na ken tur lo por bay practica e deporte aki, cual sigur no ta e intencion. Mirando tur e puntonan aki, e mandatario ta confirma cu e no por conta cu su apoyo tampoco. Mirando cu e topico a bin den medionan di prensa, comosifuera cu Minister Tromp no lo kier firm’e. Pesey a splica e procedura y e caminda cu mester cana si kier trece un cambio di ley, no obstante cu tin Covid of no, pasobra no por uza Covid pa salta ley, trapa riba ley of pa haci cosnan cu no ta cuadra cu ley!
Pa finalisa Minister Lopez Tromp a alcaria cu e forma con Bikker y Romero a trece e supuesto “cambio di ley di spearfishing” aki padilanti, cu e opcion habri pa ken cu ta tira pisca, unda cu ta y sin defini e reglanan di wega bou cua circumstancia y ken ta bay controla esaki, cu e como Minister encarga no por bay di acuerdo cu un proposicion contra ley asina.
