Dia 20 di juli ultimo a marca e 50 aniversario cu huminidad a logra baha riba superficie di Luna pa prome biaha den historia. Diferente instancia international a conmemora e logro historic aki incluyendo e organisacion local di espacio y naturalesa esta ‘Space & Nature Aruba Foundation’ cu un tremendo “sidewalk astronomy” ariba green corridor.
Tawata riba 20 di juli 1969 pa 4:18 PM (ET),durante e mision Apollo 11, Neil Armstrong acompaña pa su colega Buzz Aldrin a baha cu e modulo lunar Eagle ariba e superficie di Luna. Despues di 6 ora Neil Armstrong a baha for di e modulo Lunar y asina bira e prome persona pa cana ariba e suela polvoriente di luna declarando: “That’s one small step for man, one giant leap for mankind”. Diasabra ultimo e 50 aniversario a wordo celebra y conmemora rond mundo pa diferente organisacion internacional y incluyendo e organisacion local ‘Space and Nature Aruba Foundation’ cu a organisa un tremendo “sidewalk astronomy”.
E idea di un “sidewalk astronomy” ta pa setup un of mas telescope y asina entretene y educa publico canando band’i caminda. Durante e evento grandi y chikito por a mira den telescope y wak e planetanan Saturno y Jupiter di cerca. Tawata tin splicacion tambe con e telescope ta traha y tambe di e diferente tipo di telescopenan. E publico presente a pasa un rato masha ameno ta admira e obhetonan den espacio.
Den cuadro di e celebracion di 50 aniversario cu humanidad a baha riba luna y 100 aniversario di International Astronomical Union, e organisacion Space & Nature Aruba Foundation a setup un presentacion na Biblioteca na Playa y ta invita pueblo henter pa pasa wak e bunita exposicion entre 19 di juli pa dia 2 di augustus 2019. Pa mas informacion di eventonan organisa pa e fundacion sigui nan pagina di Facebook (@SpaceNatureAruba).
