E sindicato di Polis (SOA) a yama un Reunion General (Algemene Ledenvergadering) cu caracter di urgencia pa diabierna awo, dia 17 di April pa 10:00am na Compleho Deportivo Frans Figaroa, pazuid di Fermin’s Bar na Noord. E reunion ta bin debi na rumornan circulando den seno di Gobierno cu lo kier corta salario di ambtenaarnan, pues di Polis tambe, cu 40%. E sindicato a bisa di no lo acepta esaki y ta buscando un mandato di su miembronan. Pero awe mes Gobierno a confirma na nan cu e rumor ta falso y cu no a tuma ningu decision ainda riba e pakete di medidanan.
Presidente di sindicato SPA a confirma na nos cu a pidi un reunion mesora awe cu Minister di Husticia, mr. Andin Bikker, riba e tema aki. A splica e mandatario cu ta existi un disgusto enorme den e cuerpo di polis, cu ta trahando oranan extra e ultimo simannan aki debi na Coronavirus y ta net cu nan kier corta den salario. No a spera un sla asina aki for di e Minister di Husticia cu tanto a gradici Polisnan pa nan trabou ultimo simannan aki, pa garantisa siguridad di nos pueblo.
Minister mr. Andin Bikker a contesta e sindicato cu na ningun momento a menciona ningun sorto di porcentahe di cual ambtenaarnan, pues Polisnan tambe, lo mester entrega debi na e crisis mundial cu a presenta despues di Coronavirus. E ta lamenta cu for di un rumor, cu e sindicato a bira yama un reunion asina aki, creando panico bou di e defensornan di ley. Apenas Minister di Finansa a reuni cu Departamento di Recursonan Humano (DRH) pa fiha e opcionnan cu tin den cortamento di gastonan di personal, bou di e circunstancianan nobo awor cu entradanan di Gobierno a baha drasticamente.
No solamente e Minister di Husticia a reacciona babuca cu e reunion di e sindicato, pasobra por lo menos dos miembro di Parlamento cu ta sostene Gobierno tambe a sali publicamente desmenti e informacion di e sindicato di Polis. Specialmente Rocco Tjon, cu a sali for di Cuerpo Policial, a haya hopi presion di su sostenedonan y votadonan cu a lag’e sa mesora cu si ta bay corta den nan salario, cu e decision aki lo bay cu consecuencia politico e siguiente eleccion. Polisnan ta sinti cu mester por haci excepcion pa nan, debi na nan trabou di risico tur dia.
Mester menciona cu Minister Andin Bikker di un banda a desmenti e noticia cu lo tin un decision pa reduci salario di Polisnan cu 40%, pero si el a confirma cu tin un pakete di medida na caminda y cu tur ambtenaar, incluyendo Polisnan, lo mester entrega salario y/of beneficionan. Riba esaki e sindicato lo kier scucha di e miembronan kico ta nan posicion pa haya un mandato cla di miembresia pa bay reunion despues cu Gobierno cu un instruccion fiho di e Polisnan.
Sindicato SPA kier evita cu e lo mester scucha di Gobernantenan kico ta nan posicion pa cu reduccion di gasto di personal, pa despues bay na su base pa un mandato. E ta prefera di bay base prome, haya un mandato y informa Gobierno di locual e Polisnan ta dispuesto pa entrega of no entrega na salario y/of beneficionan.
Jose F. Dirksz, Presidente di SPA, ta pidi presencia di tur miembro di Sindicato SPA na e reunion urgente aki. Ta corda cada un, cu ta tur hende ta den e barco aki, cu ta nabegando den awanan bastante bruto ultimo simannan. Ta pidi miembronan pa acudi na Compleho Deportivo Frans Figaroa bisti cu mask, un bril di solo y alabes ta pidi pa ora ta presente na e reunion, corda mantene e 1.5 meter di distancia for di otro, cumpliendo cu peticion di distanciamento social. Ta pa e motibo aki mes a opta pa reuni eynan.