SPA: Gobierno ta pone Scol di Polis di 52 miyon den Colony cu bista pa lama y Playa no tin Warda

Polisnan ta bek na Warda di Polis na Playa, pero e miembronan di Cuerpo Policial y nan sindicato no ta contento. Nan tin problema na practicamente tur warda. Presidente di Sindicato di Polis Aruba (SPA) Jose Dirksz a bisa 24ora.com cu nan tin problema grandi na wardanan. Nan preocupacion ta riba e aspecto di siguridad y e capacidad pa cera hende.

Warda di Playa ta un di e pionan. Presidente di SPA a splica cu e facilidadnan aki no ta adecuado pa brinda servicio na comunidad. E no tin ni un compleho di cel pa detenidonan. No tin un espacio adecuado pa interogacion, cu ta un espacio indispensabel na un Warda di Polis. Manera por corda, e tabata un edificio pa bende muebles cu a dicidi di convirtie den un Warda. Esey so ta bisa tur cos. Asina el a duna ehempel di e caso di un supuesto secuestro cu tabatin recientemente. Mayoria di e Polisnan cu a atende e caso aki tabata di otro districto.

SPA: Gobierno ta pone Scol di Polis di 52 miyon den Colony cu bista pa lama y Playa no tin Warda

SPA: Gobierno ta pone Scol di Polis di 52 miyon den Colony cu bista pa lama y Playa no tin Warda. Click link pa mas https://24ora.tv/2SpvGzH

Posted by 24ora on Friday, July 19, 2019

Esaki ta un problema cu nan a bin ta papiando pa mas cu un aña riba dje. “Ta yegando momento cu nos ta bisa ta basta,” Dirksz a bisa. El a cuestiona e hecho cu Parlamento a aproba 52 miyon florin pa construi un Scol di Polis den Colony cu bista pa lama, pero districto  Oranjestad no tin un Warda di Polis. “Ban ta serio si. Unda e prioridadnan a keda. Tarea principal di Gobierno ta cuido di bo ciudadanonan.’

Espacio pa cera hende na Warda ta limita. Warda di Noord y Sta Cruz ta completamente yen. Na San Nicolas e compleho di cel a wordo “afgekeurd”, pero si haci algun cambio, Polisnan por uze pa cera hende. Pero e ta asina para pa basta tempo caba, siendo cu tin espacio pa cera 21 hende, locual cu lo trece un alivio riba e otro wardanan.

E miedo cu e sindicato tin ta cu dado momento Ministerio Publico ta bay cay den e situacion aki y no ta keda nada otro cu laga detenidonan den libertad, debi na falta di espacio. SPA ta puntra unda e prioridad ta di Gobierno. Aworaki ta mas importante pa Gobierno e Scol pa Polis cu bista pa lama cu un warda di Polis adecuado cu por brinda servicio adecuado na districto di Oranjestad. No mester lubida cu den e districto aki no tin solamente cas, pero tambe hopi negoshi, banconan, y casinonan. “Nos tin e hermentnan pa brinda siguridad na e districto aki? Esaki ta algo cu nos kier pa Gobierno contesta.”

SPA no kier a bay pa bisa di biaha cu e prioridadnan di Minister di Husticia ta robes, pero e ta algo inevitabel. Mas ora cu mira cu ta pone 52 miyon pa un Scol di Polis den Colony y Playa no tin un Warda adecuado. Nan tin problema serio cu e Warda. Tin coleganan cu a haya cancer pa via di e situacion reinante den e ambiente eynan y tur hende ta keda keto. Aworaki ta trata di soluciona tur cos na mesa y keda calmo. “Pero ora cu hemchi yena, lo bay tende di sindicato tur dia.”

A tende brevemente di e intencion pa hinca e warda di Playa na Wayaca, pero nan por a compronde cu eynan tambe tin problema cu schimmels. Ta simplemente muda e problema. Y tambe t’asina cu pa e sirbi como Warda, e mester tin un compleho di cel y espacio adecuado pa interogacion. “Bo no por djis cambia un luga cu ta un negoshi haci’e un warda di polis. Si nan kier bay renob’e, nos no a wordo avisa di esey.”

SPA y Polisnan ta na fabor di helicopter, pero mester pone prioridad. E ta bisa cu no por t’asina cu Cuerpo Policial ta “bloed dood” y Gobierno su prioridad ta helicopter. Por ehempel, falta hopi Polis riba caya. Tur escaseznan aki tin e Cuerpo Policial hopi demotiva. Mester tin boluntad di Gobierno y Mando pa drecha tur e situacionnan aki. “Awor tur cos ta keda na reunionnan sin resultado. No ta haci nada pa e Polisnan traha motiva.”

Pa loke ta e caso di e detenido cu a huy, Dirks a bisa cu tin un investigacion andando. Pero tin problema cu mester atende cu nan tambe. Si bo tin un warda unda e celnan ta completamente yen, mientras cu no tin suficiente personal pa controla continuamente, pa cual por spera cu algo similar por pasa un biaha mas.