Sindicato di Polis a yama un reunion urgente bou di su miembronan pa awe diahuebs 2:00pm na club POVA situa na Barcadera. Sinembargo, na e ora stipula e atendencia tabata casi nulo, pa cual a cera e reunion y yame pa 3:00pm. Algo mas cu 10 miembro a presenta na e reunion, locual a causa hopi disgusto bou di e sindicato.
Edgar Maduro, Presidente di SPA a reacciona rabia riba voicenote contra su miembronan. Obviamente e no por custuma cu e custumber cu miembronan di e sindicato hopi bes no ta demostra nan malcontento dor di atende na reunionnan. E ta sinti cu SPA ta haci tur esfuerso pa lucha pa bienestar di e miembronan, pero cu di nan banda no ta duna ningun tipo di sosten na e directiva. A cataloga nan como cobarde.
Di otro banda, for di momento cu SPA a yama e reunion di ultimo ora, a cuminsa core mensahenan via whatsapp den cual ta insinua cu e Presidente di SPA ta haciendo un ultimo intento pa purba baha Alto Comisario Dolfi Richardson for di su puesto, pa asina habri caminda pa Gobierno nombra Trudy Hassell den e funcion.
Pa duna e insinuacion ey mas bida, a invita Minister di Husticia, mr. Andin Bikker tambe na e reunion cu e miembronan di SPA. E lo mester a bira un scenario perfecto pa pidi kico cu ta y haya aprobacion mesora di e mandatario. Trudy Hassell den pasado tabata riba lista politico di PDR, e tempo aya bou liderazgo di Andin Bikker.
Si ta esey ta e motibo of no, no ta conoci, pero hecho ta cu ta 10 miembro so a presenta di e 439 miembronan di SPA di e 600 empleadonan civil y Polis den Cuerpo Policial di Aruba.
Na final di e reunion, Edgar Maduro a lamenta e atendencia pober aki. El a splica cu kier a atende varios tema cu Gobierno, manera ta e falta di material y otro asuntonan importante pa e trabou di Polis. Maduro ta contento cu pa prome biaha den historia di SPA, cu un Minister di Husticia ta atende nan reunion, cla pa contesta tur pregunta den forma directo.
Ta bon pa splica cu pa loke ta e funcion di Alto Comisario, prome cu Gabinete Mike Eman II a termina nan periodo, cu ya Dolfi Richardson a informa ex Minister Dowers cu e no kier sigui mas den e posicion ey y cu e lo kier lanta un departamento nobo di Interpol na Aruba. E instancia ey lo coordina tur informacion y tipnan di otro institutonan policial internacional y lo traha estrecho cu Polis y Ministerio Publico.
Asina mes, como cu den e ultimo periodo di gobernacion, Richardson a pega pisa cu SPA, te cu nan a bay den accion, cu ta sinti cu prome cu e bay cu ta haci un ultimo intento pa bahe. Esey obviamente no a logra awe pasobra e Polisnan no a ni duna oido na e reunion y pio pa pasa cualkier tipo di mocion cu por carga sosten.
Polisnan cu hopi aña di experencia ta convenci cu esaki ta resultado di metemento di politica den Polis. Antes Polisnan no tabatin mag di plak sticker ni bandera riba nan auto, pasobra como autoridad bo mester ta fiel na Rey y na e autoridadnan democratico riba Bo. Cu tempo e regla ey a bira “anticua” y a permiti hasta cu Polisnan por postula nan mes riba listanan politico. Esey a pone cu cada reunion cu SPA yama, depende e tema y e Gobierno na mando, cu e miembronan ta atende of no.
