Soul Beach Music Festival 2019: Esun miho atendi den historia!

Minister Dangui Oduber tabata contento di anuncia cu e evento di Soul Beach Music Festival di e aña aki, a kibra tur record di atendencia. A conta cu un cantidad di mas o menos 6500 bishitante cu a yega Aruba pa atende e concierto y otro actividadnan, organisa durante e fin di siman largo aki, debi cu awe dialuna ta un dia liber na Merca. Riba e foto Minister y su distinguida señora a saca un potret cu John Legend, un di e cantantenan mas popular e aña aki durante e evento.

John Roger Stephens ta naci na Merca dia 28 di december 1978 y su nomber di artista ta John Legend. E ta autor di cancion, cantante, activista, productor, pianista y actor di pelicula. Su prome produccion tabata e album titula “Get Lifted” na aña 2004. Ta bon pa menciona cu su cancion “All of Me” di su di 4 album “Love in the Future” di aña 2013 a bira # 1 riba Hot 100 di Billboard.

Di acuerdo cu cifranan oficial cu e organisado a presenta na Aruba Tourism Authority, na aña 2017 nan a bin cu 5500 bishitante; Na aña 2018 a alcansa 6000 bishitante mientras cu na 2019 a logra atrae no menos di 6500 bishitante. E cifranan aki ta forma parti di e meta cu ATA mes a impone pa e organisadonan, mara na e patrocinio.

Soul Beach Music Festival ta un di e eventonan cu mas e economia ta sinti efecto positivo di dje e ultimo dos decadanan.