E insidente di djarason kaminda dos suheto a roba e voluntarionan di fundashon Ride for the Roses di un suma di plaka, rekoudando pa e lucha kontra kanser, a krea hopi respòns positivo for di komunidat.
E reakshonnan pa respaldá e bon trabou di e fundashon ta multiple. Di diferente banda a manda no únikamente palabranan di sosten, pero mirando e meta primordial di e fundashon vários persona, famia i kompania a disidí pa hasi un donashon, grandi i chikí, pa e akshon pa un bon kousa no sufri bou di e insidente. Tin ku a bin inskribí i paga pa inskripshon i kumpra merkansia, sin niun intenshon pa bai kana, kore baiskel, landa òf spen djadumingu awor.
Di parti di Dijk Transport (riba potrèt) djaweps mainta nan a bin entregá un chèk na balor di 250 florin pa asina sikiera kompensá e pèrdida di e suma ku e antisosialnan a hòrta un dia promé. Tin ku a hasi un donashon anónimo tambe. E fundashon ta agradesido na kada ken ku a konbibí i a duna sosten na e aktividatnan ku djadumingu awor ta haña kulminashon na e di 14 Ride, Swim, Walk & Spin for the Roses. Awe i mayan djasabra ainda por inskribí na Orco Bank pa partisipá na e aktividatnan di djadumingu awor na Awasá, Mambo/BLVD i Jan Thiel.
