Sospechoso di candela fatal ta bek den libertad

3151

Fiscal a ordena libertad di e sospechoso Igor Kock ayera tardi. E tabata cera na Warda di Polis di Santa Cruz, sospecha cu lo tin algo di haber cu cendemento di candela e siman aki na Papilon, den cual su ruman Rigo Kock di 32 aña, a fayece. Ta un caso masha lamentabel, cu a conmove henter nos comunidad

Vocero di Ministerio Publico no por contesta ainda cu si Igor no ta sospechoso mas den e caso, pero a limita e contesta na: “E investigacion no a rindi suficiente a base di cual por a sigui tene den detencion. E tin di haber cu no tabatin mas motibo pa tene den detencion“.

Igor Kock ta un pashent di RESPALDO y e mainta ey ainda el a haya cuido. Husticia a bisa cu esey no ta motibo cu a lag’e den libertad.

Mientrastanto e investigacion forensico di Polis ta cana paralelo cu esun tecnico, conduci pa DTI y Cuerpo di Bombero. Hunto lo mester yega mas cerca posibel di e berdad, pues na kico a conduci cu un candela a cende y cu un hoben di apenas 32 aña ta perde su bida.