Sospechoso cu a kibra ATM di CMB na Savaneta ta conoci y pronto lo keda deteni

Den oranan di dia dialuna a sosode un destruccion riba un ATM di CMB na Savaneta. Un persona cu no ta cliente di CMB a drenta y destrui e ATM. E seguridad di e banco a yega y tambe Polis.

E persona no a bin pa lanta placa. Si el a laga daño atras cu e tin cu paga. Esnan eybanda a reconoce e persona cu a causa e destruccion. Ademas tur cos ta graba. For di momento cu bo yega pafo, ora cu bo cana yega y drenta den e pida hoki pa lanta placa, tur cos ta wordo graba cu camera di seguridad. Kiermen e chens di scapa no tey.

Despues di investigacion hasi na e pantaya destrui, a cuminsa e buskeda mesora pa e sospechoso cu a causa e destruccion. E persona aki tin cu bay paga pa e daño cu el a comete. Den pasado otronan cu tambe a causa daño mester a paga tur e daño cometi.