Despues di net un luna cera, awe merdia Juan David Panneflek, miho conoci como “Dave” a recobra su libertad bou condicion. Desde diabierna 23 di december 2022 e tabata cera, sospecha di tin di haber cu e malversacion di mas o menos 200 mil florin di placa di spaardo na Cooperativa di Ahorro y Prestamo Aruba (CAPA). Su pareha, cu tabata traha eynan, esta Joanne Jaccopucci si ta sigui encarcela den KIA.
Dave Panneflek a anuncia su libertad den forma boluntario, diahuebs atardi riba su pagina di Facebook. “Boom! Dios ta grandi. Kere den dje! Bek riba street…one love pa boso! Boso sa ken boso ta”.
Detencion ora a purba scapa
Joanne Jaccopucci, sospechoso principal di malversacion di fondo di CAPA tabata cera desde dia 10 di december 2022. Nos mes a publica e noticia aki dia 16 di november 2022, pero sin menciona nomber di e sospechosonan. Como cu polis no a detene nan mesora, Joanne Jaccopucci a pensa cu tabata ideal pa e scapa bay Hulanda. El a cumpra un pasashi pa e bay cu e yiu, pero asina cu el a yega Migracion, a drenta un mensahe na polis cu e ta purbando di bay. A activa Grenspolitie cu a yega cerca dje, deten’e y transport’e pa ward’i polis pendiente e investigacion andando. Su yiu si a opta pa sigui e vuelo pa Hulanda sin e mama.
Di dos intento tambe a fracasa
No a tarda mucho, dos siman despues, ata Dave Panneflek a dicidi cu e tambe ta bay purba su suerte. El a cumpra un pasashi ultimo ora pa bay Hulanda. Pero mesun storia, asina cu el a yega Migracion, a haya sa cu e no por biaha pasobra tin un ordo di detencion riba dje. Polis di frontera a cana yega cerca dje cu boei na man y mesora a bis’e su derechonan, a boei e, listr’e y despues transport’e pa ward’i polis. Na e momento ey ya su pareha a bay KIA caba den “voorarest”.
Ministerio Publico: E sospechso ta cera ainda
Ministerio Publico a confirma awe cu Dave Panneflek ta den libertad condicional. A splica cu su encarcelacion no ta necesario mas den e fase aki di e caso. A confirma si, cu e pareha, Joanne Jaccopucci, cu tabata traha na CAPA, si ta sigui encarcela. Pues, por nota cu e pareha cu a yuda gasta e placa horta, a sinta un luna den detencion preventivo y esun cu a malversa mes, ta sigui cera pa un luna y dos siman caba. Ta premira cu e lo sigui cera te dia e caso bin padilanti.
E acusacion
Ta acusa Joanne Jaccopucci di lo a malversa alrededor 200 mil florin di spaardo di CAPA. A logra descubri esaki y haci un denuncia. E tabatin apenas un aña trahando. E caso a cuminsa cana for di momento cu Joanne y Dave a yega di un vakantie completo y luhoso. Dimes cu placa di CAPA probablemente cu e lo a malversa.
Retiro prome
Joanne Jacopucci, un conoci di husticia, a tende di su doño di trabou cu e no por sigui traha mas eynan pasobra a descubri cu el a malversa. Probablemente e lo a pensa cu e cos ta keda te ey. E no a tene cuenta cu e hefe a keh’e na recherche pasobra ta plac’i hende el a horta.
CAPA ta fia te cu 20 mil florin
Cooperativa di Ahorro y Prestamo Aruba (CAPA) ta un union di credito, specialmente pa e miembronan di sindicato SEPPA, e organisacion di trahado mas grandi bou di empleadonan publico y companianan estatal. Ta bon pa accentua cu SEPPA y CAPA cada un tin un directiva y un hunta di supervsion separa y diferente for di otro, pa por garantisa un bon nivel di supervision y administracion di e fondonan.
Tur miembro di C.A.P.A. por bin na remarca pa un prestamo, te cu un maximo di Awg. 20.000,= dependiendo e saldo di spaar. Pa solicita pa un prestamo e miembro mester tin minimo 5 luna ta spaar den C.A.P.A. Cu un payslip di e luna anterior, un identificacion valido, ya bo peticion ta bay aden.
Na CAPA tur miembro por spaar un minimo di Awg. 25,- pa luna. Pero, contrario na tur banco, na CAPA ta paga un miho interes cu tur otro instituto financiero na Aruba. For di saldo faborabel, na final di cada aña por yega na porcentahe(nan) mas halto. Ta deduci e suma di spaar mensualmente for di e salario di e miembro.
Joanne tabata atende e fiadonan
Joanne Jaccopucci tabatin como un aña trahando na bali y ta hinca tur informacion di banco di e miembronan. Ta calcula cu e lo a malversa entre 100 pa 200 mil florin! P’esey a investiga pa yega na e ladronnan y pa por constata ken mas ta envolvi entre e trahado Joanne di CAPA, te cu banco unda e fondonan ta deposita. E trahado so no por a logra esaki sin yudansa di otro. Pesey tur esunnan cu a yuda y gosa di e suma grandi horta, mester bay duna cuenta.
Ta suppose di tin supervision
Como un Credit Union, C.A.P.A. ta un organisacion cu ta consisiti di un Directiva, Comision di Credito y un Comision di Supervision. E trabao administrativo y financiero pa C.A.P.A. ta den man di trahadonan di C.A.P.A mes. Na final di cada trimester directiva di C.A.P.A. ta manda su relato financiero na Banco Central di Aruba, pa e por haci e control necesario. C.A.P.A. ta cay bao di L.T.K. (Landsverordering Toezicht Kredietwezen). Banco Central di Aruba ta percura pa Directiva C.A.P.A. cumpli cu e stipulacionnan den L.T.K. Segun exigencianan den e L.T.K., na final di cada aña un Register-Accountant mester certifica e cuentanan anual di C.A.P.A. E procesonan aki ta un garantia cu e placa di e miembro di C.A.P.A. ta “sigur”.
