Sorteo di rifa di Rotary Club Aruba ta tuma lugar diadomingo awor 29 di Maart 2020

745

Manera Rotary Club Aruba a indica, Fiesta Rotaria 2020 a keda posponi debi na e medidanan tuma door di Gobierno di Aruba relata na COVID-19 aki na Aruba. Apesar cu ta lamenta cu mester a pospone e evento publico Fiesta Rotaria 2020 den celebracion di su 40 aniversario, Rotary Club Aruba ta compronde y sostene e necesidad di pone bienestar di nos Pais na prome lugar.

Manera conoci cerca hopi, ta e custumber di Fiesta Rotaria pa culmina cu e grandioso rifa. Rotary Club Aruba kier a enfatisa cu e rifa aki sí ta bai door manera plania. Esta dia 29 di Maart 2020 pa 5’or di atardi. Esaki lo wordo transmiti live via nos Facebook, den presencia di un Notario. E rifa e aña aki ta consisti di 12 premio, y como premio mayor un Kia Seltos SUV 2020.

Benta di rifa a cuminsa desde januari. Tambe por a mira miembronan di Rotary Club Aruba durante parada nan di Carnaval promoviendo esaki grandemente. Door di e initiativa nan aki e benta di e rifa a bai positivo. Esaki ta importante pasobra e rifa ta un di e manera nan cu Rotary Club Aruba ta recauda fondo pa asina por brinda ayudo financiero na diferente organisacion nan aki na Aruba. Den e momemento nan dificil cu nos isla ta pasando aden ta importante pa por brinda e ayudo aki na organisacionan cu mas mester di dje pa asina yuda nos comunidad surpasa esaki positivamente.

Presidente América Barrios kier a gradici pueblo di Aruba y nos colaboradornan pa e sosten continuo, hasta den momentonan mas dificil. Esaki realmente ta demostra e confiansa cu comunidad tin den e organisacion y ta duna tur miembro e energia pa sigui hasi e trabou aki.

Ademas, Rotary Club Aruba ta uni su mes na gradici y elogia organisacionan cu ta bini hunto na e momentonan aki y muy especial na tur cu ta trahando den sectornan esencial den combatimento y tratamento di e COVID-19. Rotary Club Aruba ta convenci, cu hunto nos lo supera e momentonan dificil aki.

Sigui nos ariba nos pagina social “Rotary Club of Aruba” pa keda na altura di ultimo informacionan.

Comments

comments