Sophie-Diane Donker a gradua cu puntonan halto na Universidad di Aruba

Despues di completa un trayecto di 3 aña di estudio intensivo na Universidad di Aruba, diabierna ultimo Sophie-Diane Donker a defende su tesis cu exito y a logra gradua cu puntonan halto. Cu esaki nos isla ta conta cu un profesional mas como producto di e facultad di Hospitalidad y Maneho di Turismo na Universidad di Aruba.

“No tabata añanan facil, anochinan largo, stress y miedo tin biaha, pero mi a logra. Awe mas feliz mi no por ta”, asina e graduado a bisa despues di a defende su tesis dilanti un comision special den Aula di Universidad di Aruba.

Sophie-Diane Donker a gradua cu puntonan halto na Universidad di Aruba

Sophie-Diane Donker a gradua cu puntonan halto na Universidad di ArubaPa mas info: https://24ora.news/2Vtvbr4

Posted by 24ora on Monday, June 29, 2020

E tesis a titula: ‘Job Attribute Preferences of Generation Z in Aruba’ caminda Sophie-Diane Donker a analisa e importancia cu e generacion conoci como ‘Generation Z’ ta pone riba varios atributo di trabou. El a dura 10 luna pa por a investiga, studia y analisa e materia pa por a present’e den un tesis. Diabierna ultimo el a defende su tesis dilanti un comision di docentenan. Na final, docente John Wardlaw a anuncia resultado di e tesis, cu e puntonan cu e comision a yega na dje. Mayoria tabatin un averahe hopi halto!

Sophie-Diane Donker tin 21 aña di edad, a studia na Scol Basico Washington, a sigui pa Colegio Arubano unda el a slaag pa VWO y a sigui despues pa Universidad di Aruba. Ta su intencion di sigui studia na nivel “Master”. E ta yiu mayo di Ricky Donker y Hassana Pardo. E ta pareha di Christopher Leung, cu porcierto diabierna, durante pleno celebracion di e graduacion a propone matrimonio na Donker. Masha pabien!