Inter-Assure Insurance a hasi’é un kustumber pa komo promé kompania lokal di seguro publiká e resultadonan di e negoshi di e aña anterior. E sifranan ku awe a bira konosí i ku BDO Accountants a akordá atrobe, ta mustra un bon resultado.
Apesar di e retonan grandi den merkado, na 2018 nan a bolbe logra un ganashi bunita (despues di impuesto) di 301.000 florin, 124.000 florin mas ku na 2017. Ademas, Inter-Assure su CEO Justus van der Lubbe ta haña importante pa mustra tantu e klientenan, komo e relashonnan importante di trabou riba e grado di solvensia di 189%. “Esaki mester krea konfiansa serka nan”, segun señor Van der Lubbe.
Pa di tantísimo biaha tras di otro Inter-Assure por broma pa e aña 2018 riba un sertifikashon di Couperus Actuariële Adviesgroep. Esei ke men ku riba su balansa Inter-Assure ta perkurá pa provishonnan apropiá i ku e konvenionan di reaseguro ta mas ku sufisiente. Ku otro palara, ta trata di un portafolio mas ku simplemente salú ku un grado di solvensia di 189%, loke un aña anterior ainda tabata 140%. Esei ta hopi sólido pa por yuda kliente den kaso di kontratiempu. Ku un resultado operashonal positivo di 386.000 florin promé ku impuesto, Inter-Assure a mira su kapital propio tambe krese atrobe. Apesar ku ekonomia di Kòrsou ta keda chambuká i stanká, tòg Inter-Assure a mira su kantidat di kliente i su volúmen di benta subi atrobe.
Medidanan E perspektivanan ta mustra ku e tendensia aki di kresementu por lo pronto lo no stòp, segun señor Van der Lubbe, pero loke ta prekup’é ta un seri di medida ku aparentemente gobièrnu tin den tapara. Nan lo kondusí na gastunan mas haltu pa persona, kompania i institutonan loke lo afektá e forsa di kompra di henter komunidat seriamente, ku tur konsekuensia ku esei ta bini kuné riba e diferente ramonan di maneho den un ekonomia ku ya ta drei malu. E desaroyo ei lo bai stroba hopi di e pronóstikonan di kresementu ku a sobra. Tòg Inter-Assure lo trata uniendo forsa pa enfrentá tur reto aktual i esnan nobo ku firmesa.
