Solucion pa transporte di pashent a hinc’e den problema: Director di AZV suspendi!

12454

Tabata na juni 2018 cu minister Dangui Oduber a nombra Ruben Goedhoop como director di AZV. Despues di dos aña, ayera tardi 5:30pm el a mand’e un email y suspend’e di su funcion pendiente un investigacion interno, relaciona cu un contract cu el a firma cu e compania Lite Life Medicab NV pa transporte di pashentnan sigura na AZV.

Manera ta conoci, un di e condicionnan pa e sosten y fiansa financiero di Gobierno di Hulanda pa Aruba ta encera un reduccion pisa den gastonan medico. Den esey a instrui Gobierno di Aruba pa corta 5 miyon florin den gastonan AZV pa luna, cu pa aña lo bira 60 miyon florin menos. Claro cu e proceso ey no a bay facil y tampoco a bay sin haci dolor y sin mishi cu e operacion normal di e seguro medico general di nos pais.

Un di e servicionan cu mester a corta mesora tabata transporte di pashentnan. E compania Lite Life Medicab a menasa di hib’e Corte dor di yega kibra un contract den forma abrupto. A opta e ora pa bay mesa di negosacion cu e compania y a logra un reduccion cuantioso den e gastonan aki. Pa esey a alarga e contract di Lite Life Medicab cu 2 aña mas.

Parce cu esey no a cay den mucho bon tera cerca gobierno. A cuestiona e decision aki y awor kier investiga si e proceso ey a cana como debe ser. Fuentenan yega na Ruben Goedhoop y su defensa a sigura cu aki ta trata di un conflicto di interes. Ta insinuando cu coordinadornan, chauffeur y/of bodenan di e minister mes a lanta un forma di transporte pa pashentnan. Ora cu a cera un contract nobo cu e compania profesional di transporte, a haci cu nan trabou a stop.

Fuentenan a sigura di otro banda cu henter e proceso aki a cana transparente, cu conocemento di e Hunta di Supervision di Gobierno. Abogado mr. Anthony Ruiz di e bufete Croes, Wever & Ruiz (yega na e gobierno aki) ta presidente di e directiva di AZV y como tal conoce e decision aki.

Ruben Goedhoop ta un experto den maneho y a forma un carera impresionante na PriceWaterhouseCoopers Aruba, cu despues a bira Grant Thornton Aruba. Hasta prome di a termina su trabou cu e agencia renombra, el a skirbi un buki titula “Challenging Leadership”.

No por descarta cu lo bin batayanan legal pa e decision aki, aunke cu ta keda na competencia di e minister pa suspende un director pa por haci un investigacion. Ta te ora e tuma un decision mas drastico, por ehempel retiro, cu e bataya ta cuminsa. Pero cu e decision pa suspende un persona di e funcion ako, mayoria bez ta daña e relacion y ta kibra confiansa, pa cual retiro ta bira casi inevitabel. Claro, sea e ta bin cu un “golden handshake” of cu man bashi.

Bao maneho di Minister Dangui Oduber a haci varios cambio den directivanan. Asina a yega na areglo pa kita e director di Dr. Horacio E. Oduber Hospital, a cambia e presidente di e hunta di supervision, a purba kita Jerry Staring na DVG y a impone un Management Team. A haci varios intento, incluyendo casonan den Corte, purbando pa cambia e directivadi Fundacion Lotto pa Deporte. Na Aruba Ports Authority a suspende e director financiero y despues a kit’e, aunke e no a cana sali man bashi for di waf tampoco