Solamente den Cristo Hesus tin salbacion

Den ningun otro no tin salbacion, no tin entrada pa shelo si no ta pa medio di Cristo Hesus.(Juan 14:6)

Dios a duna su yiu unigenito, pa ken cu kere den dj’E no bay perdi ma tin bida eterna.(Juan 3:16)

Esun cu kere den Hesus  no ta condena y esun cu no ta  kere lo ta condena caba ( Juan 3:17).

Dios no a manda su yiu pa condena e mundo , ma pa e mundo wordo salba door di dj’E.

Esaki ta nifica cu den cualquier estado cu bo bida ta, tin salbacion pa bo.

Con bo ta ricibi Salbacion?

Si bo confesa cu bo boca Hesus como Señor y kere den bo curason cu Dios a lant’E for di mortonan lo bo ta salba.( Romanonan 10:9).

Esaki ta un confesion cu tur hende mester haci asina cu bo tin comprondemento, pa asina pica ya no tin dominio mas riba bo (Romanonan 6:11-16).

Si bo keda sin hacie, bo ta bay contra e palabra di Dios y cay bao di condenacion, pasobra bo a rechasa locual Dios a ofrece den Juan 3:16.

Tene cuenta cu esaki no ta religion, pero ta e unico opcion cu nos tin di parti di Dios pa asina yega na bida eterna.

Ken tin mester di bida eterna?

Nos tur tin mester di dje, pasobra nos tur a peca, pero Dios no kier pa nos keda biba den pica y inmoralidad, p’esey E a manda su yiu Cristo Hesus pa nos salbacion.

Tin hende tin hopi curashi pa instrui otro pa no acepta Cristo Hesus y keda manera bo ta, den bo pica, ta hopi tristo ora nos mira con scuridad por domina hende, pasobra pa bo motibo e persona, ta rechasa salbacion. y asina no por drenta shelo.

Si un hende ta guia otro pa e caminda di Hesus Cristo cual ta hiba na e Tata, e ta riba e bon caminda.

Pasobra hende no por salba hende, ta solamente Hesus Cristo por.

Pasobra cu curason hende ta kere pa haya husticia, y cu boca e ta confesa pa haya salbacion,(Juan 10:10)  aki nos ta nota cu salbacion ta algo personal, cu cada persona tin cu tuma e decision.

Ken cu kere den Señor lo no keda brongosa, Señor nunca lo bandona nos. No ta importa ken bo ta, pasobra pa medio di fe den Hesus nos ta salba.

Dios no ta discrimina ningun hende, tin hende ta discrimina nan mes door di engaño diabolico, 

Pasobra si e palabra di Dios ta bisa: Bin cerca mi tur cu ta cansa y carga y lo mi duna boso sosiego,( Mateo11:28) esey ta conta pa tur hende, pero esnan cu no kier sali for di scuridad pa luz semper lo keda sconde tras di nan excuus.

E palabra ta bisa lo siguiente: Pasobra esun cu ta haci maldad ta odia e luz, y no ta bin na e luz, pa su echonan no wordo exponi, pasobra e stima scuridad( Juan 3:19+20).

Salbacion ta inclui arepenti,confesa y aparta. 

Awor kico tin mas balor pa bo?

Un bida den inmoralidad y pica?

Un bida yena cu malicia, infieldad, violencia, vicio y mentira?

Un bida sin ningun speransa?

Of un bida den boluntad di Dios, caminda bo sa cu bo ta salba y bo sa cu si bo wowo mester cera, ta den brasa di Papa Dios bo ta bay sosega.

Salbacion ta solamente pa medio di Cristo Hesus.

Sinceramente, Pastor Marcel Balootje.