Stichting Onroerend Goed Aruba (SOGA) a duna diferente informacion riba e situacion cu e contratista. SOGA y contratista OHL a dicidi di finalisa nan acuerdo di trabou.
Edwin Roos, tesorero y vocero di SOGA, a splica cu den media a sali cierto cos cu no ta cuadra cu e berdad. Pa loke ta trata e relacion entre nan cu gobierno, contratista y hospital ta bon. Pero, circunstancia a pone cu nan a yega n’e situacion actual. Esey a pone cu SOGA a dicidi di parti caminda prome cu cos bay mas leu y nan no por pasa den mesun porta hunto mas.
Despues di tanto aña cu e contratista OHL ta na Aruba, nan tambe kier mira e proyecto finalisa. Nan no ta bay t’ey mas te final, pero ta disponibel na SOGA te final dje proyecto pa asistencia si mester y consulta. Roos a indica cu SOGA ta inverti fondo den edificio p’e bien general y hospital ta den dje.
Tur placa paga p’e proyectonan no ta di gobierno, pero ta placa di e prestamistanan cu ta dje fondo di pensioen. Incluso tin banco cu a fia SOGA placa, pero specialmente tabata pensioen. E placa dje proyecto di hospital no ta bay afo di Aruba, pasobra tur contratista envolvi ta local. E trabounan specialistico tabata haci pa e contratista OHL. Gobierno ta paga SOGA bek e financia cu nan a haci pa e hospital por medio di huur. Asina ey gobierno ta alivia e peso fo’i e caha di Aruba door cu nan ta paga pocopoco. No mester paga e proyecto adelanta y purba despues hay’e bek via belasting.
YEGA NA ACUERDO
Contratista OHL y SOGA a dicidi di bay rumbo diferente. Pero door di e relacion amical y profesion cu nan tabatin di tanto aña, di cual nan a cuminsa cu e proyecto na 2014, segun Roos, nan a yega na un acuerdo hopi lihe. Incluso e tabata hopi beneficioso pa ambos partido, sigur pa SOGA. Ambos banda ta lamenta di a yega asina leu, pero a dicidi di stop awo prome cu bira enemigo di otro.
Cu hospital mes ta existi un bon relacion, pasobra SOGA ta den nan cas. E vocero ta haya cu nan tin bon relacion profesional cu hospital pa seis of shete aña, pero tambe amical. Mas di 90% dje proyecto ta cla, kiermen falta menos di dies porciento pa termina cu ne. Un gran parti di e material cu mester ta na Aruba caba of ta na caminda.
Den e situacion aki, pa SOGA e miho solucion tabata dispidi di OHL cu nan acuerdo. Mester finalisa e acuerdo door di e abogadonan, pero e resto di trabou no ta specialistico cu nan no por sigui cu e contratistanan cu a traha pa hopi aña riba e proyecto.
