Social Crisis Plan ta activo desde december di 2018 y ta conta awe cu un total di 22 socio entre sectornan; social, hudicial, salud y enseñansa, caminda un total di 38 proyecto ta wordo subsidia.
Sociaal Crisis Plan ta un plan nacional cu e iniciativa pa traha cu instancianan den tur 4 sector caminda hunto ta colabora y traha preventivo, curativo y represivo den e cuadro di abuso di mucha.
Un di e proyectonan grandi y primordial di Sociaal Crisis Plan ta pa introduci e ley di Codigo di Proteccion Infantil y Hubenil (Child Safety Code) cu ta wordo ehecuta door di Sue-Ann Ras como coordinador nacional di e codigo di proteccion infantil y hubenil. E ley di codigo di proteccion infantil y hubenil ta un plan nacional y cu sosten di Unicef Hulanda tin como meta pa proteha tur mucha y hoben entre 0 pa 18 aña riba un nivel profesional entre sectornan; social, hudicial, salud y enseñansa.
E ley di codigo di proteccion infantil y hubenil ta cubri tur aspecto huridico pa asina tur profesional den e 4 sectornan por traha mas structural pa proteha e mucha di cualkier abuso y of situacion cu e por ta pasando aden. Tur 4 sector lo wordo guia y structura pa un lider di proyecto, caminda hunto nan lo forma e “taskforce” entre e sectornan cu ta carga e responsabilidad pa implementa e proceso di ehecucion di e codigo di proteccion infantil y hubenil segun e stapnan oficial ora ta trata di sospecho di casonan di abuso di mucha.
Den un momento historico cu a tuma luga, 23 di januari 2020, caminda despues di un trayecto largo di preparacion, e Procesmanager di Sociaal Crisis Plan cu ta alabes e director di Departamento di Asunto Social; sra. Glenda Hernandez a reuni cu Directie di Bureau Sostenemi, Volksgezondheid (DVG), Voogdijraad (DVR), Wetgeving en Juridische Zaken (DWJZ), Onderwijs, Opvoed Commissie y Signs Of Safety. Presente tambe tabata sr. Hendrik Tevreden di Parlamento y representantenan di Unicef Hulanda Stan van Haaren y Anne Kroon.
A elabora y consulta ariba puntonan di desaroyonan y concepto pa locual ta trata e ley di codigo di proteccion infantil y hubenil. Sociaal Crisis Plan tin e mision pa finalisa e trayecto di e ley di codigo di proteccion infantil y hubenil pa asina Parlamento por trata esaki. E vision di Sociaal Crisis Plan ta pa elimina tur causa y preveni cualkier tipo di abuso di mucha pa asina tur mucha aki na Aruba por sinti su mes sigur. Y poco poco cu e cambionan aki cu ta wordo ancra den nos leynan, nos cadena profesional por traha mas amplio pa asina brinda cada mucha e proteccion cu nan tin derecho ariba dje. E bienestar y siguridad di nos muchanan ta e responsabilidad di nos tur.
