SNBA ta na fabor di control financiero pero no mas cu shete aña

520

San Nicolas Business Association (SNBA) a manda un carta pa Gobierno den cual nan ta splica nan posicion pa cu e condicionnan poni door di Hulanda pa yuda Aruba cu un suma di prestamo pa e isla. Esta e Rijksfinancieel toezicht cu Huland kier impone riba Aruba.

Den e carta ta para cu despues di a asisti na un reunion convoca pa gobierno di Aruba conhuntamente cu gremionan, ngo’s, sindicatonan y demas invitadonan dia 8 di Juli ultimo, e directiva di SNBA a sinta inmediatamente cu tur miembro di directiva pa tuma un postura basa riba e informacionnan cu a ricibi. Esaki basa riba e posicion di Hulanda pa den forma unilateral impone control absoluto riba nos islanan.

“Na prome luga e ta e pensamento di SNBA, cu solamente den un forma solidario unda cu ta laga diferencianan un banda y enfoca como un solo Aruba, tanto Gobierno, opositornan, gremio y NGO’s cu un solo enfoke, por reacciona riba e ponencianan tirano di Hulanda.”

Nan ta bisa cu desde e ultimo imposicion di Hulanda, instalando na Aruba un asina yama CAft, Aruba a haci peticion pa institui un organo di arbitrahe cu lo atende cu futuro disputanan entre e partnernan den reino. Ta haya cu deliberadamente, Hulanda ta haci caso omiso di esaki y awe atrobe ta mustra e necesidad di dicho organo. Directiva di SNBA ta di opinion cu Hulanda inhustamente ta scoge un momento memey di un pandemia mundial pa pone su partnernan den reino na rudia cu un deadline pa tuma un decision den menos di un siman. Esaki na momento cu gobierno y Parlamento Hulandes ta baha cu vakantie sin importa e impacto y repercusionnan di esaki.

SNBA ta sostene e asercamento cu Hulanda pa prome Minister y ta kere den habri e caminda pa negociacionnan pa cu e condicionnan relaciona cu duna Hulanda e control financiero. Aruba ta consciente di necesidad financiero y tambe consciente cu no ta posibel di sali di e crisis financiero y economico sin asistencia di Hulanda y pa e motibo SNBA ta propone pa Aruba manifesta di ta di acuerdo cu e control financiero sinembargo e control mester bin cu cierto condicionnan:

1. Garantia di sanea Finansas y e economia di Aruba den e periodo proponi door di Hulanda cu ta pa 7 aña.

2. Un entrega sin retraso di autonomia bek na Aruba despues di dicho periodo di 7 aña!

3. Cambio of amplia e rol di funcion caminda cu Aruba tambe por lanta/tin un instituto di supervision pa

percura cu e institutonan di Hulanda esta CAFT y LAFT den nan maneho di control lo cumpli debidamente.

4. Elimina tur posibilidad pa un renobacion di e acuerdo unico aki.

5. Instalacion di caracter inmediato di organo di arbitrahe menciona den punto 3.

6. Si no logra cu punto 1, garantisa Aruba un prestamo sin interes pa Aruba tuma bek control y sigui su destino como partner igual den Reino.

7. Aruba mester por continua negociacionnan cu inversionistanan actual y tin e libertad pa keda trece

inversionistanan local y internacional.

Tin mas punto di interes cu e directiva a toca pero ta nan intencion pa acerca e partnernan di gremio, sindicatonan, NGO’s y otronan pa UNI den un bloke pa fiha un posicion unilateral pa cu e situacion aki.