Durante un conferencia di prensa cu a tuma luga recientemente, San Nicolas Business Association (SNBA) a trece algun informacion pa su stakeholdernan, pa asina informa nan di loke ta sosodiendo y kico lo bay sosode den e proximo seis lunanan.
Fuera di esey, segun presidente di e asociacion, Andres Hernandez, tambe a papia di e diferente proyectonan cu apenas ta cuminsando y tambe di esunnan cu t’ey caba, cu no ta proyecto mas, como tambe di nan posicion respecto cada un di nan y kico ta pendiente.
Ta papia di 28 proyecto, pero ta concentra riba esunnan cu ta andando. Un di nan ta e Secrets of Baby Beach, cu recientemente tabata tin un Groundbreaking y cu tin movecion riba esaki.
Bayendo pa loke ta e parti turistico, tin hotel meymey di caya grandi cu tin 14 camber plus casino vergunning. A indica durante nan cumbre teni recientemente, cu asina e proyectonan cuminsa, ta bay mira movecion inmediatamente. Esaki ta hopi positivo, Hernandez a comenta.
Tin tambe e hotel di caya pricipal, cu ta Hickinson Hotel, cu realmente ta den un fase final. Un di e rumannan tin esaki na notario cla pa cumpra. Nan a cuminsa haci’e limpi caba. Ta spera cu durante e proximo aña por mira movecionnan hopi positivo eynan.
Hunto cu esaki ta creando un ripple effect. Loke ta e parti di e pacusnan cu ta existi den e caya, e doñonan ta riba 60 y 65 aña. E hobennan, esta e mileniums, no ta interesa pa sigui. E ta bisa cu “nan ta bolbe Aruba despues di nan estudio, tin biaha cu dos krenhi di cen y unda bo ta bay hink’e. Ta bay hink’e den un dying city? Cu no tin sentido. Mayoria di pueblo di p’ariba di brug, a bay di acuerdo cu e hotel, aunke na principio nan tabata contra, door di e efecto cu diferente persona a haci nan comentarionan profesional y por tabata tin hopi rason riba loke nan a bisa. Sinembargo, a mustranan cu nan ta robes. Na e momentonan aki e ripple effect di e hotel aki, cual ta e catalisator mas grandi pa e asociacion, e ta creando cu personanan kier bin pariba pa pone restaurant. Tin non-motorised watersports cu kier cuminsa. Tin tours cu kier bin p’ariba. Y asina por keda menciona. Ta e industria ta buscando pa bin p’ariba awo.”
No mester keda sin menciona cu tin un San Nicolas Ports Authority den porta tambe, segun Hernandez. Unabes cu tin e puerto, unda cu e ferry lo bay drenta y sali proximamente, maneha cruceronan chikito, tin hopi cambio cu lo bay bin. Un di e partinan mas importante, tin cu menciona, ta cu minister Otmar Oduber, publicamente a indica cu no lo tin mas shoppingmalls den Colony y cu San Nicolas y vecindario, mester bira e shoppingmall, tanto di e hotel, manera su empleadonan y su huespednan.
E inversionistanan tambe a menciona of a ripiti durante e Groundbreaking e mesun palabranan, unda cu nan ta spera cu San Nicolas y p’ariba di brug, cu Gobierno por logra cambia den un area turistico. Esey ta nifica cu e oportunidad ta asina grandi pa San Nicolas y vecindario, cu e ta bay ta algo hopi positivo.
SNBA ta mirando un renacemento di no solamente San Nicolas, sino full p’ariba di brug.
E papel di SNBA
San Nicolas Business Association ta yama nan mes gatekeepers. Nan ta hunto cu tur e otro organisacionnan. Pronto lo tende di otro movecionnan cu lo ta mas pega cu organisacionnan cu tin di haber cu turismo, cu comercio. Ta buscando pa nan ta cerca di tur loke tin di haber pa por mehora y cambia e situacion.
