E medidanan nobo cu Gobierno a anuncia dialuna anochi no a cay den bon tera cerca doñonan di snack truck. Nan ta sinti cu di mes nan tin hopi reto cu e orario adapta y si caba cu “nightlife”, automaticamente lo caba cu e trucknan di cuminda tambe. Nan ta subraya cu e dos negoshinan ey ta ruman di otro, pasobra ta despues di “trip”, ta pasa truck cumpra cuminda pa bay cas.
Doñonan di trucknan di cuminda a sigura cu nan a haya un sla masha duro mes, desde luna di maart cu a introduci medidanan pa distancianan social, samenscholing, shelter in place y toque de queda. Nan mester a cera nan portanan completo, cu tur consecuencia pa nan entrada y gastonan.
Pa algun luna nan mester a keda cera, pasobra nan tipo di negoshi no tabata permiti. Pocopoco a cuminsa habri bek den e normal nobo y mester a acepta y adapta na sirbi djis un parti chikito di e mercado di custumber. Esey pasobra cu pa 11:00pm tur negoshi mester ta cera, pues nan tambe. Mester tene cuenta cu prome cu 1:00pm nan tin competencia di restaurantnan chines y e fastfoodnan cu a haya permiso pa keda habri te laat. Pues nan mercado de facto ta anochi laat, prome cu ciudadanonan bay cas bek.
Ora cu awo porfin nan a cuminsa manera haya un bida bek, aunke hopi menos di loke a custuma cu ne, ata atrobe ta reintroduci medidanan inpopular. Ta haci cu atrobe mester cera mas trempan. Cada biaha cu introduci medida pa e restaurant, barnan y clubnan nocturno, mesora e ta influencia e trucknan tambe. Esaki pasobra tin un corolaciom directo den ambos industria. Mas hende riba caya den laat, mas cliente pa e trucknan. Asina cu ta crea panico pa manda hende cas trempan of wanta nan na cas obliga, ta traduci su mes den caida directo den benta na e snack trucknan.
Por lo menos un di nan a vocifera cu pa awo Gobierno mester compronde cu Coronavirus a bin pa keda y cu hende lo contagia cu ne. Pa esey mester canalisa e caminda di salud publico pa cua nan y preveni contagio. Pero pa mata henter economia di un pais, djis pa algun hende contagia, no ta husto tampoco. Nos mester siña biba cu Covid-19 pasobra el a bin pa keda! Locual di lo no keda ta e negoshinan di anochi, si Gobierno sigui aplica medidanan asina.
Un doño di truck a vocifera cu e Ministernan ta bin cu medida pasobra nan si ta cobra nan salario tur luna sin problema, mientras cu den sector priva midi tur luna pa mira con ta rek e florin pa e por rende mas. Ta sinti un falta di comprension for di gobernantenan cu no ta tene consideracion di con duro nan medidanan ta impacta e grupo di snack trucknan na Aruba.
