“Cu hopi placer awe nos ta entrega premio na tur nos carnavalistanan cu a resalta den carnaval 65. Sin nan creatividad nos hendenan no por a gosa di un carnaval 65 impresionante”, asina Shannon Henriquez, Presidente saliente di Stichting Maneho Aruba su Carnaval (SMAC) a duna di conoce durante un evento special den fin di siman.

El a bisa den su discurso cu SMAC ta na antesala di hopi noticianan interesante relaciona cu desaroyo di e organisacion, cu ta pasando den un etapa pa por haya un persona pa ocupa e presidencia, di cual lo trece cune miembronan nobo, motiva, inspira pa sigui cu e trabou cu e directiva cu tabata bou di su encargo pa e ultimo 3 añanan.

SMAC a entrega premionan di Caranaval 65

SMAC a entrega premionan di Caranaval 65

Posted by 24ora on Monday, September 2, 2019

“Mi tin tur confiansa cu e siguiente Presidente lo sigui e trabou cu nos a bin ta haci pa e ultimo añanan. Un trabou boluntario cu no tabata facil, nos mester a para duro bandi otro pa ehecuta e plan cu nos tabata tin y pensamentonan di tur esnan cu ta forma parti den un forma directo y indirecto di nos organisacion” segun Henriquez a enfatisa.

Carnaval ta ranca sali oficialmente 11-11 y cu SMAC a mira un apertura di carnaval cu a bira grandi den un forma unico, un idea cu a inspira Kevin James cu pueblo carnavalesco a brasa, esta e “Legend Festival”.

Shannon Henriquez, Presidente saliente di Stichting Maneho Aruba su Carnaval (SMAC) net prome cu el a tira su ultimo discurso den su funcion di lider di e organisacion.

“Na e Presidente nobo y miembronan nobo, hopi exito, hopi forsa, hopi pasenshi, tolerancia, hende facilmente lo por critica pero pa haya boluntario pa yuda ta poco, pesey nos tin un aprecio na tur esnan cu a entrega na tempo, idea pa nos por celebra e manifestacion cultural di mas grandi riba nos isla cu ta Carnaval. Manera Don Milo Croes a yega di bisa…Carnaval di Aruba si ta Carnaval. Biba Carnaval, Biba SMAC, Biba Aruba!”, asina Shannon Henriquez a termina su discurso.

Comments

comments