Slak di carne, Cerion Uva pero no Arubanum

1292

Den cuadro di e reciente notificacionnan cu Departamento di Agricultura, Cria y Pesca (DLVV) por medio di social media a ricibi tocante slaknan invasivo DLVV kier a comparti un storia tocante e Cocolishi di carne, Cerion Uva.

Segun Hovestadt A. & S. Van Leeuwen, a skirbi na 2017, e prome malacologista, un experto di slak, kende a haci trabou di campo extenso ariba e islanan ABC tabata H. B. Baker na 1922.

Tabata tin otro biologonan prome kendenan a publica tocante slaknan di e islanan pero nan mes no a colecta e muestranan. Baker despues di un extenso estudio di campo di e slaknan di tera di e islanan a reparti e C. uva den 4 subspecie y di tres di nan el a subdividi mas ainda. Acerca el a nota cu e fauna mollusca di Aruba por lo general ta asocia mas cerca cu esun di Curaçao parti pabou pero cu e C. uva arubanum ta mas similar cu C. uva uva di Curaçao parti pariba.

El a comenta tambe ariba e distribucion peculiar restringi di C. uva den e fauna reciente di Arubana un region smal na e costa pabou central, aunke e tin un presencia tur caminda ariba e isla como fosiel of casi fosilisa.

Despues di Baker diferente malacologista a revisa su hayazgonan. Gould na1969 y 1984 a demostra cu e Cerion fosilisa di Aruba ta morphologicamente distinto y ta agrupa cu muestranan di Curaçao parti pabou y Boneiro, mientras muestranan moderno di Aruba ta agrupa cu esunnan di Curaçao parti pariba.  Gould na 1971 ta mustra cu Cerion ta ausente den e restonan arkeologico di cushina di Canashito cu por indica un cambio di dieta of cu Cerion no tabata presente e tempo ey.

Na Curaçao hendenan a haya Cerionnan den restonan di cushina arkeologico cu indicacion cu hende a kibra nan pa come. Ta na 2014 Harasewych a clarifica e taxonomia di e Cerionidae di e islanan por medio di un estudio genetico. En berdad a resulta cu cierto populacionnan di Cerion ariba e islanan tabata asina unico cu e tabata hustifica nan clasificacion como subspecies. Asina bo por haya C. uva uva, esun prome describi, banda di C. uva diablensis y C. uva knipensisna Curaçao. Boneiro tambe tin su propio subspecies, e C. uva bonairensis. Sinembargo e sorpresa mas grandi di e estudio tabata cu e Cerion di Aruba ta hopi cerca di Cerionuva uva. Sorprendente pasobra como fossiel di e tempo Quarternario e ta bon presente.

Un conclusion consecuente di e estudio ta cu e Cerion cu awendia hende ta haya na Aruba no ta descendiente di esun fosilisa pero cu nan lo a bin di e bisindario di Schaarlo, Curaçao por medio di hende di e West Indische Companie den siglo 17 of prome di indjannan Caquetío. Consecuencia di e hayazgo aki, segun Harasewych 2014,ta cu Cerion presente na Aruba durante e periodo Quaternario a muri prome cu yegada di hende, Harasewych, 2014.  Si esaki resulta berdad, por resulta cu e Cerrion fosilisa por haya reconocimento como un subspecies. Lamentablemente e nomber C. uva arubanum no lo ta disponibel mas debi cu e nomber tabata uza caba pa un muestra cu a resulta di ta un introduccion. Mas dificil Haresewych 2014 a haya pa visualisa un evento cu por a resulta den extincion di Cerion na Aruba pero no na Curaçao of Boneiro y laga otro slaknan terestre endemico di Aruba na bida. Un posibel splicacion segun Harasewych 2014 por ta relaciona cu e puntanan mas halto di Curaçao y Boneiro ta mas halto cu 210M.

Pa mas informacion email DLVV na [email protected], of jama 5858102.