Den tur e turbulencia cu tin na Colegio Arubano, entre tur e instancianan envolvi, por bisa, segun informacion ricibi di e Comision di Mayornan di Colegio Arubano, cu a yega na un decision entre partidonan cu SKOA (Stichting Katholiek Onderwijs Aruba) ta bay maneha Colegio Arubano pa dos luna.
Oudercommissie Colegio Arubano (OCCA) den un declaracion ta splica cu for di momento cu e directiva nobo a sinta, a lesa statuutnan di tur e organisacionnan y intercambio di cartanan, pero tambe a combersa cu tur partido envolvi den e problematica of situacion reinante na Colegio Arubano, y asina a bin compronde un poco miho e situacion y tambe compronde e motibo pakico Obispado di Willemstad a pidi e directiva di SMOA (SVOA) na tres ocasion pa tuma nan retiro.
Den e carta tambe ta menciona cu e impasse a causa cu Obispado a kita e asignatura di scol catolico for di Colegio Arubano y cual a nifica cu Gobierno a para e subsidio na Colegio Arubano entrante prome di augustus, 2020 y a pidi SVOA pa entrega yabi di e edificio den cual nan ta sinta pa dia 30 di juli awo. E edificio y tereno ta propiedad di Gobierno.
E carta ariba menciona ta haci e carta di e directiva cu nan por retira entrante prome di september no ta valido mas, segun OCCA. P’esey nan ta bisa cu si mayornan sigui paga boekenfonds y contribucion di mayornan na SVOA, tin chens cu ta uza e placa pa otro cosnan cu no ta Colegio Arubano. OCCA kier salvaguardia pago di mayornan y esey ta e motibo cu OCCA a conseha tur mayor referente e pago.
Mientrastanto Obispado, Minister di Enseñansa y SKOA a yega na un acuerdo cu e fundacion aki ta administra Colegio Arubano durante dos luna, pendiente di e trabou y recomendacionnan di un comision cu e tres instancianan a lanta.
Pronto OCCA ta anuncia na unda, ki ora y di ki forma lo sigui cu e pago normal.
