Den cuadro di Dia Internacional di Mucha, cual e aña aki a cay rib’un diadomingo, e docentenan di Maria Goretti College y Ayo Kleuterschool a bini hunto pa asina organisa un actividad pa nan alumnonan.
Scol tin un Comision di Maestro y hunto como ekipo, tur e docentenan di e dos scolnan a traha rib’e actividad pa asina haci esaki un realidad, segun Mirla de Cuba-Tromp, cabesante di Maria Goretti College. A prepara diferente actividad p’e muchanan, manera e weganan popular, weganan di antes, tabata tin ‘cotton candy’, un stand di popcorn. Pa cada klas, e docente a zorg pa un actividad.
De Cuba-Tromp a sigui bisa cu e scol tin un Comision di Mayor cu a sostene e docentenan den preparacion di e actividad y pa asina sigura cu e ta uno exitoso. Riba e dia aki ta dedica tempo n’e tema aki di derecho di mucha cu nan alumnonan, ta siña e muchanan cu nan tin derecho pero tambe obligacion como persona y e dosnan aki ta bay den man den man.
Por ultimo, e cabesante a gradici tur e mayor- y docentenan, sin laga afo Ministerio di Enseñansa cu a yuda e scol cu tent, pa asina tabata tin cierto areanan cu por tabata tin tent.
Un mensahe tabata pa, como mayor, stima y cuida nos muchanan. SIgur mester tin disciplina, pero awendia tin hopi manera cu por disciplina. Mester tin pasenshi, cada mucha ta den proceso y nan ta cana segun nan ta desaroya, cual ta rekeri di hopi pasenshi.
E ta desea tur mucha un felis dia di mucha.
