Un decision unilateral tuma door di gerencia di WEB pa baha salario y beneficionan secundario di empleadonan, a pone SIWA yama un reunion urgente cu su miembronan awe tardi. Esaki tabata pa haya un mandato di e proximo paso despues di a haya e carta cu e anuncio aki. Erick Henriquez, presidente di SIWA a sigura cu e miembronan ta uni y a bisa cu nan ta bay te unda mester bay, pero no ta acepta pa viola CAO ni corta den nan salario.
Por corda ultimo, SIWA a manda un carta pa WEB y informa nan pa simplemente respeta e CAO y no ta bay sinta negocia. “Gerencia ta bay baha salario, pero nos no ta acepta.
Y nos ta bay bringa esaki. E intencion ta pa bay Corte. Nos abogado ta preparando tur cos y djey nos ta mira unda e barco aki ta bay pega. E asunto aki ta un rotzooi total, un bruhamento di tera completo, un falta di control. Mi no tin palabra pa describi e cos aki. E manera cu no a controla cua compania estatal a duna of no a duna, a trece tur e problemanan aki.”
Tur e situacion aki a surgi, segun Eric Henriquez, pasobra gobierno no tabatin e control necesario. Tur e companianan mester a entrega na mei aña pasa cuanto nan ta bay entrega.
Na momento cu no a haya un carta di reaccion, gobierno mester a yama puntra con a para. Y fin di mei ora cu e prome tranferencianan a drenta, di con no a yama puntra con a para cu e otronan. Tur esaki ta mustra cu tabatin un fayo den control y supervision di parti di Gabinete Wever-Croes.
E no tin palabra a caba di describi e situacion sino un rotzooi cu tur e falta di control den e situacion aki.
SIWA a keda hopi decepciona cu e estilo di e carta cu director a manda pa nan. El a sinti un tinte politico y no ta menciona cu a haya ordo di Utilities pa tuma e decision aki. “Nos no ta keda man crusa. Nos ta bay bring’e.”
