Situacion preocupante: Minister Ursell Arends a converti candela riba dump den un crisis

A bira normal caba cu tin candela riba dump y ta custumber tambe cu Cuerpo di Bombero no ta ni bay mas. Pero e biaha aki e candela a crece di tal forma cu hasta Minister Ursell Arends a presenta. Hunto cu BRA, a dicidi di activa DOW pa nan combati e candela uzando santo en bes di awa. Un proceso cu lo dura largo pero cu ta necesario pa bienestar di e bario.

For di diabierna a nota candela riba dump, e candela pocopoco a sigui crece y pa diasabra anochi tabata mas grandi ainda. E bario ta Parkietenbos, Buena Vista, Bucutiweg y bisindario ta preocupa cu desaroyo di e candela. E minister encarga cu naturalesa, esta Ursell Arends a ricibi basta mensahe for di habitante preocupa. Debi na e situacion di tempo, ta teme cu biento por bolter y afecta e area. E mandatario a dicidi di presenta na dump pa mira con por paga e candela y atende cu e situacion. E minister a avisa e departamento di crisis kende no a pensa dos biaha y tambe a presenta.

Situacion preocupante: Departamento di crisis y minister presente na Dump

Situacion preocupante: Departamento di crisis y minister presente na DumpClick link pa lesa mas: https://24ora.news/3O5iSvm

Posted by 24ora on Saturday, November 12, 2022

“Nos ta preocupa”, asina Minister Ursell Arends, a inicia bisando durante un entrevista cu representante di Headlines Group, kende t’e cas editorial di 24ora.com y TREMPAN. E situacion ta delicado y pa evita cu e bario sinti e efecto, a dicidi di atende cu ne na tempo. Pa atende cu e situacion, tin mester di ekipo y esey ta locual cu Serlimar no tin. Di otro banda, no por paga e candela cu awa, pues brandweer no lo por atende cu e candela.

P’esey mes a informa DOW pa nan presenta pa wak con por yuda cu algun truck di santo pa paga e candela. Tur e motibonan aki ta muestra dicon tin cu cera Parkietenbos, segun Minister Ursell Arends. El a informa tambe cu e candela riba Parkietenbos a afecta aeropuerto durante dia, caminda tabatin efecto riba bahada di avion.

Den e era cu nos ta bibando aden actualmente, tipo di ‘landfill’ asina no ta cuadra mas. E mandatario su meta ta pa cera dump pa 31 di december, sinembargo el a anuncia un primicia durante e entrevista, caminda ta evaluando pa cer’e mucho mas trempan.

Rino Hermans, director di Bureau Rampenbestrijding Aruba (BRA) a duna di conoce cu na momento cu tin un incidente cu por afecta e ciudadanonan di e pais, BRA ta activa. E asina yama “effectgebied” e biaha aki ta e bario cerca di Parkietenbos. Debi na e ‘tropical wave’ den cercania y e tempo instabil, ta necesario pa soluciona e problema riba dump. Como departamento di crisis, nan tarea ta pa trece tur instancia hunto y palabra con y di ki forma lo atende e situacion.

DOW a presenta, pero prome cu cuminsa cu e proceso pa basha santo riba e candela, lo evalua e area prome. Lo midi si ta responsabel pa bay cu e trucknan riba dump y pa siguridad di e empleadonan publico. Tin hopi lodo tambe riba dump, pues esey ta un otro reto cu e trucknan lo confronta nan mes cu ne. Ta premira cu trabounan lo dura varios ora, ta premira cu te ora solo sali lo ta bezig cu e candela. BRA lo sigui monitor e situacion, si dado caso biento cay prome cu nan a logra combati e candela. BRA lo cuminsa cu e proceso di evacuacion di henter e bario.

Gobierno ta bou presion adicional pasobra tin sentencia di hues cu ta indica cu mester tuma decision awo, sino e bario por hiba e minister dilanti y demanda pa daño y perhuicio.